Mahindra Pikup 4x4 LPS Pro Muaythai 2022 title fight chu zirtawpni zan khan neih a ni a, a hmuhnawmin mipui hlut a hlawh hle a ni. 

Title fight zana khuallian Dr Franklin Lalrinngheta, Dealer Principal, Mana Motors chuan,"Mizo ṭhalaite tana pen chhuak ve ṭhin kan nih angin LPS Pro Muaythai nen thawh dunna remchang kan nei a, a lawmawm hle a ni. Nun uluk loh avanga a hun lova thihna pumpelh turin ṭhalaiten ṭan kan lak a ngai nasa a, infiamna hi a pawimawh a, muaythai khel tur phei chuan fit em em a ngai a, mahni invenna ṭha a ni bawk. Fighter-te an kal zelna turah duhsakna ka hlan a ni," a ti.

Title fight result:

FLYWEIGHT

Joseph Vanlalhruaia (Hunthar) bt Lalngaihawma (Hunthar)
= Unanimous Decision (30-27, 29-28, 29-28)

Unauin title an inchuh a, round thum chhungin hmuhnawm thamin an inbei phak lo. A upa zawk 2019 Asian silver medal latu, kum 22 mi Joseph Vanlalhruaia'n tawk hnem zawkin an khelh danah a chungnung zawk tih a lantir tel a, chutih rualin kum 19 mi Lalngaihawma'n hmabak beisei awm tak a nei tih a lantir ve thung.

BANTAMWEIGHT

Lalruatkima (Falkland) bt Ramdinthara (Pangzawl)
= Unanimous Decision (29-28, 29-28, 29-28)

Kum 23 mi Lalruatkima'n muaythai thiamna hrang hrang hmangin a bei a, fuh taka hnek a neih ṭhin bakah petin a nghawk bawk a, a hlawhtlinpui. Kum 21 mi Ramdinthara'n ṭum danga a khelh dan a phak lo va, a innghahna a kuttum hmang ṭha viau chungin hnek zawn a harsat a, mi dang angin a nuai thei lo. Ruatkima'n a ke thiam taka a hman bakah chiang taka hnek fuh a nei tel deuh reng a, mar takin a khel tluan. A champion hnuah lawm avangin a lungchhia a, ring announcer aurinna laksakin bawm chhungah a awm laiin ṭawngṭaiin lawmthu a sawi.

LIGHTWEIGHT

Ngursaimawia (Luangmual) bt George Lalmuanawma (Chawnpui)
= Split Decision (28-27, 28-27, 26-29)

Kum 27 mi Ngursaimawia'n tawn hriat a neih chhawrin a thiam thil pakhat a champion-pui. Kum 25 mi George Lalmuanawma'n a pan tluan a, mahse, Ngura'n a ke ding lamin a bekah a lo petsak hnuah an inkuah zui zel a, an inbeih chhungin Muanawma'n awmze neiin a khawih thei lo va, a kuah nasat avangin Ngura point vawi hnih paih mah se judge pahnihin an chaktir tho a ni.

WELTERWEIGHT

Zarmawia (Chite Veng) bt Isaac Lalchhuanmawia (Chanmari)
= Split Decision (28-29, 29-28, 29-28)

Zarmawia'n a duhthusam tihlawhtlingin thahrui fei leh tharum a neih ṭhat a dinchanpui a, champion kawnghren a hren hnuah bawm chungah a pa ko lutin a hrentir a, a chawimawi. Kum 19 mi Isaac Lalchhuanmawia'n ngil taka a hnek zawn leh a pet fo hmangin lehlam a tibuai na a, beiseiawm takin a khel tluan. Kum 24 mi Zarmawia kutthlak a nain a langsar a, thiamna hmang tam a nih bakah hneh taka nuai lai a nei ṭhin a, vir chungin a nghawk fo bawk. Hmuhnawm takin round thum chhung an inbei a, a tawp lamah Chite Veng fighter a langsar lehzual.

SUPER MIDDLE (OPEN)

Lalṭhasanga Lelhchhun (Tanhril Vengthar) bt David Lalremruata (Zemabawk North)
= Technical Knockout (27 sec)

Huhang nei Lalṭhasanga Lelhchhun lakah David Lalremruata'n a zahawmna a humhim zo lo va, an inbei ṭan chiah tihin world championship round of 16 lut tawh, kum 26 mi Ṭhasanga'n a ke ding lamin a bekah a pet a, Remruata tluin a inhnukdawk zui a ni.

D3 Haier Fighter of the Night (Rs 2,500)
- Zarmawia (Chite Veng)

LAWMMAN

Champion : Rs 30,000 + kawnghren
Runner-up : Rs 15,000
Semifinalist : Rs 7,500
Quarterfinalst : Rs 3,000

MI MAL CHAWIMAWINA

D3 LG Best Referee (trophy + Rs 4,000)
- PC Vanlalthuammawia (Ṭhuampui)

D3 LG Best Judge (trophy + Rs 4,000)
- H Lalnuntluanga (Zotlang)

D3 LG Promising Fighter (trophy + Rs 5,000)
- Isaac Lalchhuanmawia (Chanmari)

D3 LG Best Fighter (trophy + Rs 7,000)
- Lalruatkima (Falkland)