DOWNLOAD OUR APP

Read latest news on your phone
app-store

Mahni anpui langsara kawp tuai 6 leh patil 10 awm - SSF

Apr 18, 2015

Mahni anpui langsara kawp tuai 6 leh patil 10 awm - SSF

Aizawl: Synod Social Front zirchianna atanga a lan danin Aizawl khawpui chhungah mahni anpui kawp Tuai 6 leh Patil 10 an awm. Synod Social Front hian nikum lam atangin Aizawl khawpui chhunga Tuai leh Patil chungchang hi an lo zirchiang tan tawh a. Tuai hi thahnem tak awm mah se mi tam zawk chu inthup an nih avangin zirchiannaah hian telh an ni lo va, a langsar zual te chauh zirchian an ni a, Tuai 30 leh Patil 30 ah zirchianna hi neih a ni. Tuai bikah hian zawhna chhangtu mi 30 zinga 6 chuan kawppui nei lai an ni tih an sawi a, kawppui nei loa insawi mi 24 zingah hian a khat tawka kawp nei engemaw zat an awm bawk a ni. Tuai zinga zawhna chhangtu mi 26 te chuan an awmdan chu ‘pianpui ve rengah an ngai’ tih an sawi a, an zinga mi 16 pawhin an awm dan avangin Kohhran leh khawtlangah an inkiltawih tih an sawi laiin mi 14 te chuan inkiltawihna an nei lo tih an sawi thung. Tuai zingah vek hian zawhna chhangtu mi 12 te chuan Kohhran leh khawtlangin tanpui se an duh tih an sawi a, mi 7 in hrethiam se an duh a, mi 11 te erawh chuan an duh ang anga nun phalsak se an duh tih an sawi ve thung. Synod Social Front in Tuai an zirchian te hi kum 16 atanga 35 inkar te an ni. Patil bikah hian mi 30 zinga 10 te chuan kawppui an nei mek tih an sawi a, an zinga mi 25 te chuan an tet laiin hmeichhe toys aiin mipa toys an lawm zawk. Zawhna chhangtu Patil 30 zinga 27 chuan an awmdan chu an pianpui ve rengah an ngai a, mi 28 in an awmdan chu an chhungten an hriatpui tih an sawi a. An awmdan avanga Kohhran leh khawtlanga inkiltawihna nei chu mi 28 niin zawhna chhangtu mi 30 zinga 19 chuabn Kohhran, khawtlang leh ramin tanpui se an duh a, 7 ten hrethiam tura an duh laiin 4 erawh chuan an duh anga nun phalsak an duh tih an sawi bawk. Zirchianna a zawhna chhangtu Patil mi 30 te hi kum 12 atanga kum 40 inkar an ni.
Share now