Aizawl; Mizoram ah mahni intihlum kumtinin mi engemaw zat an awm ziah a, heng mite hian mithiam zawkte rawnna chang hre thin se an duh tih helam kawnga hma latu mithiamte chuan Zalen an hrilh. New Life Charity Society (NELICS) General Secretary Dr. Zawmsanga chuan mahni intihlum an awm reng mai chu mipuiin an la hriatthiam tawkloh vang leh an ngaihtuah tawkloh vang nia a hriat thu a sawi a, "mipuite helam kawngah hian kan la harh tawk lo a, a invenna lam ngaihtuah lovin helama thawktute chauh tih turah kan ruat a, chuvangin mahni intihlum hi a tam phah niin ka hria a ni," a ti. Dr. Zawmsanga chuan mahni intihhlum chu ven theih a ni tih sawiin hemi kawnga chhungtinte inbuatsaih a tul tih a sawi bawk. Lalremruati Assistant Professor, Department of Psychology, Aizawl West College pawhin mahni intihhlum tumte chuan mithiamte puihna zawng se a duh tih a sawi a. Mahni intihlum te chuan an chhungte ah rilru hliam nasa tak a siam thin avangin an tih hmain inngaihtuah ching hmasa thin se a duh tih a sawi bawk. Zalen palaiin a biak naah Lalthantluangi Sailo, Asst. Professor, PUC pawhin media lama mahni intihlum a lan tam hian tih tumte a fuih (encourage) thei tih sawiin fimkhur tak media lam pawhin an puanzar thin a pawimawh a ni a ti a. Ziaka dahthat theih anih avangin Tv/Radio aiin chanchinbu lama tarlan in hna a thawk nasa thei zawk nia a hriat thu a sawi bawk. Kumin hian mahni intihlum 63 an awm tawh a ni. Department of Psychology, Pachhunga University College chuan Sept. ni 10 'World Suicide Prevention Day' pualin an hmunah 'One day state level workshop on suicide : sensitization and prevention among media professionals' hmangin workshop an buatsaih dawn a, mithiamte thuziak ngaihthlak a sawihona neih zui a ni dawn. Hetah hian Dr. Rinpari Ralte leh Dr. Saichampuii Sailo te lehkhabu ziak chu Dr. K.Ropari, Principal Director, Health Department in a tlangzarh ang.