Khawvelah kum tin mahni intihlum an pung zel a, hei hi a veiawm hlea a hriat avangin UNO chuan mahni intihlum venna ni hial a puang a. Mizoramah pawh September 10, 2018 khan hman a ni. Mizoram Police chhinchhiah danin kum 2012 atanga July 2018 thleng khan Mizoramah mahni intihlum mi 583 chhinchhiah a ni a, heti zat lai mai intihlum an awm hi vei tham a ni reng a ni. Mi thiamte chuan mahni inthhlum hi ven theih a ni tih an sawi a, chumi atan erawh chuan mi thiam zawkte pan a ngai thin a ni. Tunlai khawvelah hnathawh a inang lo tawh hle mai a, sum leh pai mai bakah thil hrang hrang avangin khawsak inang lo lutuk hian stress a siam nasa a, hei hian intihhlum mai duhna rilru a pawchhuak thin a ni. Mizote hi kan intihhmuh nge ni kan huaisen tawk lo tih mai turin kum tin mai intihlum hi mi eng emaw zat kan awm reng mai a, kan thenawm state bakah India rampum ngaihtuahin kan sang fal hle a ni. Nunna hi a hlu a, Pathian chauh lo chuan a pe thei lo a ni. Chuvangin, keimahni thu mai maia kan nunna kan lo la fo mai hi a pawi hle a, ven theih anih avangin a ven kawngah mi tinten tih theih kan nei theuh a ni. A pawimawh hmasa berah chuan rilru hahna leh manganna te hi mi tin tawh vek a ni tih kan hriat thar a, natna chi khat a ni tih kan pawmthiam a tul hle mai. Natna chi khat anih avang tak hian helam enkawl thiam Psytiatrist leh Clinical Psychologist te kan pan thin tur a ni. Mizote rilru puthmang diklo em em mai chu rilru lam Doctor ‘Psytiatrist’ pan hian ‘Mi â’ angah kan inchhuah tlat thin  hi a ni. Doctor tam takin natna an hriatchian theih lohte pawh Psytiatrist pan turin leh an natna hre turin an tir fo a, chu chu ‘An â’ tihna a ni lo. Chuvangin, harsatna kan nei anih chuan mi thiamte pan nachang i hria ang u. Hei mai bakah hian Mizote hi kan tawrhchhel tawk lo deuh em ni aw tih mai a awl hle bawk. Harsatna chu mi tinin kan tawk vek a, chung harsatna laka talchhuak tur chuan keimahni pawhin kan beih ve a ngai a. A lungchhe zawng leh vanduai bik anga inngai lo va, ‘Ka thei ve a ni’ tih rilru pu chunga kan tuang kan tihchhah lehzual a pawimawh. Kan chhung leh thiante harsatna tawk an awm anih chuan dawhthei taka an harsatna kan ngaihthlak a, mi thiam zawkte hnenah kan hruai vat chuan tun ai hian mahni intihlum hi kan tlem zawk ngei a rinawm. Khawtlang, Kohhran leh mi mal tinte kan tanrual chuan mahni intihlum hi kan titlem thei ngei ang.