Nizan zanlai khan UEFA Champions League quater-final first leg chu Stamford Bridge-ah Chelsea leh Real Madrid ten an khel a, Madrid star striker Karim Benzama hat-trick hmangin mikhual Real Madrid lam chuan 3-1 in chakna an chang. Blues tan hian Kai Havertz chuan goal khat a thun ve hram a, kar leh lamah second league an khel ang.  Inkhelh pakhat zawkah Villarreal chuan an mikhual Bayern Munich 1-0 in an hneh ve thung.

Inkhelh tan atanga minute 4-na lekah Militao chuan hla tak atangin goal shot a nei a, goal-ah a lut teuh hle. Minute 10-ah Vinicius-a'n chance tha neiin post a pet per a, goal-ah a chantir zo lo. Inkhelh a tang chho zel a, Militao-a'n Yellow Card a hmu zui. 

Minute 20 naah inkhelh boruak tidanglam turin mikhual lamin Benzama hmangin goal an thun. Goal khat luh hnu minute thum chauh a liam tihin Benzama bawkin goal a thun leh. Real Madrid an phur tual tulh a, Chelsea lamin tlawm mai an tum bik lo. Si hnih an phurh hnu minute 10 a liam tihin Carvajal-a'n tha zetin goal a shot a, Mendy-a'n alo dan sak hlauh. First half tawp lam minute 39-ah Kai Havertz chuan goal rawn thunin an si hnih phur a rawn su kiang hret. 

A ropuina belh chhah turin Karim Benzama chuan khelmual chhunga hmelma te tana ral hlauhawm ber pakhat a ni tih lantirin goal a khung leh. Hemi hnu hian, Lukaku chuan goal ngei tura ngaih remchang tak mai a tauh goal lo. A hnu minute khat lekah Mount-a long shot-in bar a per dawt bawk. 
Inkhelh chhung zawngin goal dang a luh belh lo.

Tuchel chuan,"Madrid a kal leh hun tur aiin Inrinni zana kan hmachhawn tur Southampton lam ngaih pawimawh hmasak a ngai. Mahse, kan game ngai anga kan khel leh a nih erawh chuan Southampton lakah pawh kan mualpho leh tho ang," a ti. Sawi zawmin, "Kan tlawm dan kha mualphona lian tak a ni. Stamford Bridge ka awm hnua first half kan khelh chhiat ber a ni. Kan game atang khan mimal tinin zir thar tur kan nei theuh a, team ang pawhin kan thiamna leh nihna kan khel chhuak phak lo nasa a, kan chak zo lo kha thil mak a ni hran lo," a ti. 

Inkhelh pakhat zawkah pawh beisei lawk loh thil thlengin Bundesliga champions Bayern Munich chu Villarreal lakah 1-0 in an tlawm. Inkhelh atanga minute 7-na lekah Danjuma hmangin Villarreal lamin goal hmahruai an thun a, goal dang a luh belh lo. Inkhelhah hian team tha zawk Munich an chungnung zawk a, mahse Villarreal lamin an nawr vawi khatnaah goal an thun nghal. 

Karleh lam khian second leg mipui 52,000 lenna Allianz Arena-ah khelh a ni ve thung dawn a, Munich hian semi-final luh ngei tumin tha pui thawhin an mualah Villarreal an hmachhawn dawn a, result thlak danglam thei tak maw! 

Chelsea vs Real Madrid 
Line-ups
Chelsea XI: Thiago Silva, Azpilicueta, Jorginho, Rudiger, Christensen, E. Mendy, Kante, Mount, Pulisic, Havertz, Reece James
Subs: Lukaku, Alonso, Saul , Kovacic, M. Bettinelli, Kepa, Werner, Ziyech, Loftus-Cheek, Kenedy, T. Chalobah, Sarr

Real Madrid XI: Modric, Benzema, Kroos, Alaba, Courtois, Casemiro, Carvajal, F Mendy, Valverde, Militao, Vinicius
Subs: Bale, Marcelo, Nacho, Vazquez, Mariano, Vallejo, Asensio, Ceballos, A. Lunin, Rodrygo, E. Camavinga, Toni Fuidias

Villarreal vs Bayern Munich  
Line-ups
Villarreal XI: Albiol, Capoue, Parejo, Coquelin, G. Rulli, G. Moreno, Lo Celso, P. Estupiñán, Groeneveld, P. Torres, Foyth
Subs: Asenjo, Iborra, Gaspar, Mandi, Aurier, Alcacer, Moi Gómez, Trigueros, R.Peña, Pedraza, S. Chukwueze, Yeremy

Bayern XI: Neuer, Muller, Lewandowski, Gnabry, Kimmich, Coman, Lucas, Pavard, Upamecano, Alphonso Davies, J. Musiala
Subs: Ulreich, Sabitzer, Sule, Goretzka, Sane, Roca, O. Richards, Fruchtl, J. Stanišić, Kouassi, M. Tillman