UEFA Champions League quarter-final first leg nizana khelhah team tha pahnih inhmachhawnin City an chungnung zawk. La Liga champion Atletico Madrid chu nizan zanlai khan Primier League champion lai Manchester City chuan an mual Etihad Stadium-ah an mikhual a, inkhelh an thunun bakah an chungnung zawk hle a, mahse City hian goal khat bak an thun thei lo. Cityzen te hi chak mahse karleh lamah Atletico mualah an len luh ve a ngai dawn a, kar tharah hian nizana an chakna leh hlimna te hi chawhreh leh vek theih a la ni. 

Inkhelha chungnung zawk City hian inkhelh chhungin shot 15 an nei a, Diego Simeone-a naute erawhin City lamah shot pakhatmah an nei lo. Simeone-a hnuaia shot nei miah lo va an khelh tluan vawi khatna a ni nghe nghe. City hi ball 71% zet changin vawi 695 an in pass kual laiin Atletico player te ke atangin ball vawi 297 chiah pass a chhuak thung. 

First half lamah hian goal hlauhawm em em awm lovin team hnih te hi an innawr tawn a, goal thun kawnga tuihal coach tha pahnih enkawl team te hi an danglamna a lang tam lo. Ball chang tam zawk City lam pawhin goal an hnaih hleithei bik lo va, minute 45 chhungin Jan Oblak-a tan harsatna an thlen lo. 

Inkhelh atanga minute 11-naah Laporte chuan a lu a ball tauhin goal chhungah a lut lo hlauh. Minute 10 a liam leh tihin Gundogan chuan na takin goal a shot a, goal kham khumin minute 46-a a shot pawh goal chhungah a lut lo. Minute 54-ah De Bruyne a ball Oblaka'n a dan sak. Minute 63-ah Laporte bawkin a head lut teuh hle a, a chance nei that goal a chantir lovin bar a khum.

Argentine midfielder De Paul chuan minute 68-ah yellow card a chawi. Lehlam pawl talbuai lai remchangah lain minute 69-naah chuan inkhelh boruak tidanglam turin Phil Foden a ball pek tha zet chu De Bruyne chuan goal-ah lo chantirin, goal hmahruai leh awm a thun. Goal dang luh belh lovin sikhat faiin Man City an chak. Kar leh a Atletico Madrid muala an len luh hunah Diego Simeone-a naute lakah an sikhat neih hi hum ngei an tum dawn a, hum tluan thei tak maw! 

Line-ups
Man City XI: Gundogan, De Bruyne, Mahrez, Sterling, Cancelo, Laporte, Ake, Stones, Ederson, Bernardo, Rodri
Subs: Carson, Fernandinho, Grealish, Zinchenko, Z. Steffen, Jesus, Foden, CJ Egan-Riley, Luke Mbete-Tabu

Atletico XI: Vrsaljko, Oblak, Savic, Griezmann, Kondogbia, Koke, Felipe, Reinildo, Llorente, Felix, Lodi
Subs: Suarez, Wass, B. Lecomte, Lemar, De Paul, Correa, Hermoso, Matheus Cunha, Christian, Ibrahima Camara, Javi Serrano