Zirtawpni chhun, khaw en laiin Delhi-a chhungkaw pahnih chu khawlaiah nasa takin an inphek sual a, a bul hnaia awm leh kawnga kalte pawhin thelh zai rel lovin an thlir thup ringawt mai.

Chhungkaw hnih insualte hian kuttum mai duhtawk lovin tiang nen an inbei a ni.

Police chuan video hrang hrang thehdarh an en atangin tute nge an nih tih leh a bultumtu ber nia an hriat hre tawhin an man.

Police hian Delhi hmarchhak, Usmanpur venga inphek sualna thleng an hriat veleh an kal nghal a, an thelh nghal a. Hliam tuarte pawh damdawi inah an kalpui nghal bawk.

Video eng emaw zat zinga pakhatah chuan mipa pahnihin leia tlu pa pakhat an sawisa lai a lang a. A sawisatu pakhat zawk hian hmanrua leh thing bung pawh a keng a. An sawisak mawlh mawlh lai hian nu upa lamin tawp turin a lo dang a, he nu hi an sawisak mek chhungte hi nia hriat a ni.

An sawisak chu a chet theih tawh loh hnuah mi dang pahnih an insual leh a, a dang insual zui pawh an awm nual bawk.

A bul hnaia kalte chuan an en reng ringawt a, an bul hnai ina mite pawhin an tukverh atangin an thlir thup ringawt bawk.

Police-in an chhui tawh chinah chuan Shyamvir leh Jagat chhungkua an intibuai nia hriat a ni a. An tu leh fate nen an inphek sual chiam nia ngaih a ni.

“Kan chhui tawh chinah chuan lehlam lehlam hian thil (property) hlui tak pakhat neitu zawk niin an inchhal ve ve a, tun hma pawhin thubuai an lo siam tawh a. Vawiin bikah erawh Jagat hian Shyamveer-a leh a chhungte hi a bei ta a ni,” tiin police chuan an sawi.