US-a pa pakhat, taksaa tlereuh beh leh inverh ching tak pakhat chuan kum nga zet a hnarbeh bo a zawn tawh chu hmun maksak takah a hmu a, a chuapah a lo awm daih.

Kum 35 mi, Joey Lykins-a hian a tlereuh hi a mut hlana tla niin a ngai ngar ngar a, engtin nge a chuapah daih a lo awm theih tih reng a ngaihtuah phak ngai lo niin New York Post chanchinbu chuan a tar lang.

Lykins-a hian he a hnarbehna bakah hian a taksa hmun dang 12 zetah inverhin tlereuhin a chei a, tuna a hmuh leh tak hi chu ‘souvenir’ atan a ti ta mai niin a sawi.

“Ka dawlh a ni ngei ang. Hmun tin ka dap a, ka khum lepsein ka hau nasa hle a ni,” a ti.

Zan khat a mu chu nasa takin a khuh a, “Ka hnungzang a rawn na chhuak a,” a ti a. “Eng emawin ka thawkna dawt hi hnawh niin ka hria,” a ti.

Damdawi inah hruai niin doctor-te chuan pneumonia a nih an ring a; mahse, an han X-ray chuan hnarbeh 0.6 inch-a sei chu a chuapah an hmu ta a ni.

Doctor-in X-ray thla a entir hmasak ber chuan a hnarbeh nen inang a tih thu a hrilh a, doctor pawhin a awih lo hial a ni.

A hnarbeh a chuap a lo khawih pawi lo va, lak pawh an la chhuak lo.