Gujarat-a nu pakhat hi Covid-19 kai, enkawl dam har ber pawl a tling ngei ang, ni 202 zet hnuah damdawi in a chhuahsan ve chiah.

Kum 45 mi, Geeta Dharmik-i hi a pasal chu railway-a thawk a ni a, hri leng thawh hnihna hun lai khan Bhopal atanga a haw chu May 1 khan hri a kai tih hriat a ni a, Dohad-ah enkawl a ni.

Dahod railway hospital-a doctor chuan a dam ta tih puangin Zirtawpni khan a chhuahtir ve ta nge nge a. A chhungte pawh an lawm hle.

“A chhungte chuan an lo lawm hle a, ni 202 chhung hi Dahod leh Vadodara damdawi inah a hmang a, ventilator leh oxygen pek reng a ni,” tiin a pasal, railways engineer Trilok Dharmik chuan a sawi.

A damloh chhung hian tum kua phei chu thi mai tur angin an ngai hman a; mahse, a dam chhuak leh a, a tawpah phei chuan damdawi in a chhuahsan thei ta hial a ni tih a sawi.

“April 23 khan ka puzawn a thih avangin Bhopal-ah kan kal a, Dahod-ah April 25 khan hawin ka nupui hi a damlo va, May 1-ah hri a kai tih hriat a ni ta a. A oxygen level hniamin a khawsik nasat bawk avangin railway hospital-ah dah a ni ta a ni,” a ti.

May 6 atangin a dinhmun a hniam zual a, a tukah Vadodara-a mi mal damdawi inah sawn niin May 23 thleng a awm.

May 24 khan Dahod-ah sawn leh niin ventilator nen thla hnih, BiPAP nen thla khat enkawl a ni.

A damloh chhung hian a thi teuh thin hle a, vawi khat phei chu a chuap thlak ngai hial tur angin doctor-ten an hrilh tih a pasal chuan a sawi.

“A dam hret hret a, oxygen pek a la ngaih lai pawh kha a taksa dang chu a tha a, ni 202 zet hnuah kan inah a lo kir leh ta a ni,” a ti.