Muzaffer Kayasan-a hi leukemia natna nei sa a ni a, Covid-19 a kai tih a hriat hmasak ber tum chuan thihpui ngei turah a inngai a; mahse, a ni ngawt bik lo. Tun thleng hian vawi 78 zet inendik (test) tawhin a la kai chhunzawm ngar ngar a, thla 14 chhung zet chu hripui a vei tawh tihna a ni.

Kum 56 mi, Kayasan-a hi Turkey rama Covid-19 kai rei ber nihna chelh mektu a nih thu doctor-te chuan an sawi a. Cancer a nih sa avangin a taksa ralveng sipai a chak lo chuan a tidam har niin an sawi a. November, 2020 atang khan damdawi in leh an chenna ina a awm chu a inzat deuh reng a ni.

Thla kua zet chu damdawi inah hun a hmang a, a bak thla nga dang pawh hri a kai miau avangin flat hranah awmtir a ni a. A tunu, Azra-i a awmna flat bul huan atangin darthlalang chhanah an inkawm thin.

A doctor, Istanbul University-a infectious diseases & clinical microbiologist Serap Simsek Yavuz-a chuan an hriat china hripui vei rei ber a ni a, a hri kai chu a insiam danglam em tih pawh an thlithlai ngun hle tih a sawi.