Spain-a unau 12-te kum belhkhawm chu kum 1,058 leh ni 249 zet a ni a, Guinness World Record-ah an hming ziah luh thar a ni.

Hernandez-Perez unau hi Gran Canaria thliarkara Moya khuaa cheng niin a naupang ber hi kum 76 mi a ni a, a upa ber chu kum 97 a ni thung.

“World record kan siam ang tih ngaihna kan hre phak lo,” tiin an chhungkua chuan an sawi a, an unau hi mipa pasarih leh hmeichhia panga an ni tih Guinness World Records-in thuchhuah an siamah tar lan a ni.

“Hetianga record siam tur hian June thlaa chhungkaw intawhkhawm kan neiha fiamthua kan sawi atanga intan kha a ni a. A hnua chanchinbua thuchhuah kan hmuh thupuiah, ‘Unau 12-te kum belhkhawm 1000 chuang,’ tih kan lo hmu zui a, heta tang hian Guinness World Records lam thlengin thil a kal zui ta a ni,” tiin an chhungkua chuan an sawi.

An unau zinga upa ber, Jose Hernandez-Perez chuan December thla hian kum 98 a tling dawn a. A naupang ber, Luis Hernandez-Perez, chuan April thla khan kum 76 a tling ve thung.