DOWNLOAD OUR APP

Read latest news on your phone
app-store
Mallorca hnehtu Barcelona La Liga-ah pahnihna
May 02, 2022

Nizan Camp Nou-a inkhelhah Barcelona chuan Mallorca 2-1-a hnehin point thum hlu tak an hlawh chhuak a, La Liga table-ah Blaugrana hi pahnihnaah an kai a, match li khelh tur la awmah pathumnaa awm Sevilla aiin point hnihin an sang rih mek. 

Mual neitu Barca hian kar hmasa khan Rayo Vallecano sikhat faiin an hneh lova, mahse tun dinhmunah chuan nakum season-a Champions League khel turin dinhmun tha takah an ding mek. Mallorca thung hian an game hnuhnung berah Alaves chu 2-1-in an hneh ve thung a, tunah hian relegation zone chung hretah an inhamtang ve bawk. 

Inkhel hmuhnawm takah hian team hnihte hi an inhnehtawk hle a, mikhual lam hi an khel tha mah zawkin a hriat. Minute 14-naah Barcelona lam hian goal thunna hun tha an nei a, Gavi cross ball chu Pierre-Emerick Aubameyang-a'n goal-ah a chantir thei lo thung. Mallorca lam hian an chance neih hmasak berah an ti goal teuh hle a, hnai set-sawt atangin Fernando Nino chuan goal shot-in goal ban sir lamah a pet chhuak. 

Barcelona goal hmasa zawk chu Memphis Depay-a'n minute 25-naa a thun a ni a, second-half minute 54-naah Busquets a goal hmangin Barca lamin an goal hnihna an thun leh a, thlamuang takin sihnih faiin hma an hruai. 

Inkhelh chhung hian Barcelona leh Mallorca lam hian chance tha an nei nual a, mahse goal-ah an chantir hlei thei lo. Sihnih phur Mallorca lam an hnual mai duh bik lo, theih tawp chhuaha bei letin minute 79-naah free-kick atangin an captain Raillo chuan an goal khatna a thun a, 2-1 a ni. Goal dang luh belh lovin inkhel a tawp zui. 

Barcelona Player Ratings
Marc-Andre ter Stegen - 6.5/10
Dani Alves - 7/10
Gerard Pique - 6/10
Ronald Araujo - 7/10
Jordi Alba - 7.5/10
Frenkie de Jong - 6.5/10
Sergio Busquets - 8/10
Gavi - 7/10
Ferran Torres - 6.5/10
Pierre-Emerick Aubameyang - 6.5/10
Memphis Depay - 8/10

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh