Aizawl February 20, 2023: Mizoram State Day 36-na chu Mizoram district hrang hranga hman a ni a, a lawmna pui ber Vanapa Hall-a hmanna a khuallian Zoramthanga chuan, Rambuai avanga harsatna te leh tuna remna muanna kan neih dan te chu siamtu'n chhan neia a rel vek a ni a ti a, Malsawmna haichhuah chu mitin kuta awm a nih thu a sawi bawk. 

Chief Minister Zoramthanga chuan,"Mizoramin kum 36 lai State nihna a chang ta hi a lawmawm, he niah hian Mizoram hi midangte tan malsawmna ni tura inbuatsaih a tul a ni," a ti. CM hian pi leh pute thlangtlak dan leh, tuna Mizoram a lo indinchhoh dan sawiin, "Rambuai harsatna tinreng paltlangin vawiinah remna leh muanna duhawm tak hnuaia hun kan hmang thei hi Siamtu’n chhan neia a rel vek a ni. Midang tan malsawmna ni thei tura min buatsaihna a ni a, chu malsawmna haichhuah chu tu dang kutah nilovin keimahni kutah theuh a awm a ni," a ti. 

Zoramthanga chuan Mizoram-ah malsawmna haichhuah tur, a chhunga cheng mipuite a let engemawzata chawm zo ram hman tangkai tur ram zau tak a la awm thu te, sik leh sa nawm piah lamah ruahtui a that thu te, hmalakna ti awlsamtu atan a tlangpuiin tawngkhat an hman piah lamah rinna thuhmun nei leh zirna lamah pawh literacy tha a ni zel te chu hmalak ti awlsamtu a nih thu a sawi. "Hmasawnna chu thawklehkhata thleng vek thei ni lo mah se, a rahbi thiam taka kan zawn a, kan kalpui a tul a, hei hi mithiamte tan chona nise ka duh," a ti a, State Day lawmnaa kalkhawm sawrkar hotute chu Mizoram tan theihtawp chhuah turin a sawm a ni.

State Day lawmna inkhawm kaihruaitu Dr. Renu Sharma chuan State Day kum 36-na lawm a nih hian Mizoramah hmasawnna tam tak hmuh theih a nih thu a sawi a, chutihrual chuan hmabak tam tak - a bik takin industrial sector leh entrepreneurship tihhmasawn lamah a la awm a ti. State dangte nen khaikhinin hmasawnna kawng zawh tan tlai viau mah se, Mizoram chu a thlen chin a thui viau tawh Chief Secretary hian a ti. Mizoram chu khawtlang nuna bet tlat tlawmngai pawl leh kohhran pawimawhna avangin sawrkar inrelbawlna kawngah thui taka a puih thu leh awlsamna a siam thu a sawi bawk.

NGO CO-ordination Committee Chairman R. Lalngheta pawhin ram hmasawn zelna tur atan mitinin mawhphurhna kan nei tih he State Day ah hian hrehhuak thar leh ila a duh thu a sawi a. Sawrkar hruaitute leh sawrkar hnathawktute chuan Zoram dah pawimawh hmasa ber a, hlemhletna tello a hna an thawh pawimawh a tih thu a sawi a ni.