ZALEN October 2, 2025: AMC Ward XII huamchhunga veng pathum Dinthar, Tuikual North leh Tuikual South-ah te vawiin hian Faina hnatlang neiin beihpui thlak a ni a, plastic hmanraw hlui leh sarang lamte lei nghal a ni. AMC Ward XII chhunga faina beihpui thlak hi Ward Corporator, Aizawl Dy. Mayor ni bawk R Thanglura chuan a telpui hlawm a ni.

Dinthar Local Council leh Dinthar Sanitation & Beautification Committee-te ruahmannain Faina hnatlang hawnna leh plastic lam thil lei hi zing dar 7:30 khan Dinthar Local Council House kawtah buatsaih a ni. Hun hmanpuitu Aizawl Dy. Mayor R. Thanglura, chuan, "Mamawh loh lakhawm a, lei vak thin kan nih avangin a thehthang danah bung thar kan kai a tul tawh hle a. Thil hlui hman nawn leh pawh kan intihhmuh a hun tawh a ni," tiin, "Fai hi kan tlin a, fai tur chuan mahni tana hnawksak tur thenfai kawngah leh midang tana hnawksak siam lo tura bawlhlawh kan thehthang loh a ngai a ni," a ti bawk.

Tuikual North-ah chuan Tuikual North Local Council House-ah zing dar 10:00 khan hun hman a ni a. Hun hmanpuitu bialtu Corporator R .Thanglura chuan,"Faina lama theihtawp chhuaha khawtlang thahnemngaihnaah lawmthu ka sawi a. Midangte tihhmuhtu ni zel turin tan i la zel ang u," a ti. Tuikual North-ah hian Local Council leh Tuikual North Health, Sanitation and Beautification Committee - te hmalaknain faina hnatlang neih bakah plastic hmanraw hlui lei khawm a ni.

Tuikual South-ah chawhma dar 11:00 khan Jubilee Runah hun tawi hman a ni. Hun hmanpuitu R.Thanglura chuan, "Local Council leh Branch YMA-ten thawhhona tha tak nei a, khawtlang faina in vei hi lawmawm ka ti a. Nasa zawka bei zel tur leh naupang leh thangtharte nunah fai an nunpui theihna turin zirtirna lo uar zel ula, Khawtlang hmasawn a turin kan thawk ho zel ang," a ti.

AMC Ward XII chhunga veng hrang hrangte hnenah hian faina lama hma an lakna turin R.Thanglura chuan Rs.15,000/- theuh a pe a. Tuikual South-ah hian Jubilee Run tan tui connection lak sak bakah tuizem a pek tur thu a sawi bawk a ni.