Aizawl: India ram chhung leh ram pawn hmun hrang hranga fa mamawhten Mizo naupang 321 chu fa atan an la tawh. State Adoption Resource Agency (SARA) thawktute hnen atanga Zalen thudawn danin naupang nu leh paten an fa atana fahrah naupang an lak zinga 285 hi India ram chhunga lak an ni a, a dang 36 hi India ram pawna lakte an ni. SARA thawktute chuan India ram chhunga naupang latu tam ber hi Mizo an ni tih sawiin India ram state hrang hrangah pawh la an awm nual niin an sawi a. India ram pawna latu tam ber hi France, Spain leh Italy-ah an ni tiin heng ho bakah hian USA, Denmark, Belgium, Norway, Korea leh hmun dangah pawh an awm tih an sawi bawk. Zawhna chhangin SARA thawktute chuan fa/naulak (adoption) chu uluk taka kalpui a ni tiin a latu turte zirchianna neih hnuah chauh an ‘fit’ nia hriat a nih chauhin nau laktir thin an ni tih an sawi a. Hei bakah naupang chu an lak hnuah an dinhmun thla 3 danah kum hnih chhungin en thin a ni tih an sawi bawk. SARA thawktute chuan fa la duh chu an tam hle nia sawiin naupang an neih tlem avangin nghah a ngai zawk niin an sawi bawk.