ZALEN February 9, 2026: 2028 KTP General Conference chu a thlengtu tur Mamit lam an remchan tak loh avangin, CKTP hruaitu ten a thlengtu tur an dap kual hnuah Champhai -a Zotlang Sports Stadium-ah nghah tura ruahmanna siam niin ZALEN chuan thu a dawng.

Mamit hian 2028 KTP General Conference thleng tur hian hun rei tak an lo inbuatsaih tawh a, mahse, thlen an tumna ber Mamit GSA Field chu tunah hian grass phah tura ruahmanna siam a nih avang leh phah mai tura hna thawh tan tura inbuatsaihna kalpui mek anih avangin hman theih a ni dawn lo a, grass phah hnuah pandal sak a rem dawn loh avangin Mamit lam hian an tan thlen a rem ta lo niin thudawnna chuan ZALEN a hrilh. Hmun dang han nghah mai na tur remchang an hmu lo niin thudawnna chuan a sawi bawk.

Central KTP hian 2028 KTP General Conference thleng tur Mamit lamin an phat tak avang hian a thlengtu tur an zawng a, Champhai lam biak an nih hnuah Champhai lam hian rem an lo tih tak avangin thleng turin thutlukna siam a ni a, Bethel bial, Zotlang bial leh Ruantlang bial ten Zotlang Sports Stadium-ah an thleng dawn niin thu dawn a ni.

2030 KTP General Conference thleng tur hi official chuan puan a la ni lo a, Saitual-a General neih hunah puan tur a ni. KTP General Conference hi March Pathianni hmasaber mil turin a hun hi ruat thin a ni.