Aizawl: Nimin zing khan Mamit Bazarveng Indoor Stadium kawtah faina leh thianghlimna inzirtirna hun neih a ni a. Hemi rual hian Mamit Bazar veng chu khawlaia bawlhhlawh paih lohna veng (Litter Free Zone) a puan a ni.   Fai inzirtirna huna khuallian H.D Lalpekmawia, District Urban Development Officer, UD&PA, Mamit chuan Mamit khawpui chhunga a hmasa ber tura khawlaia bawlhhlawh paih awm lohna venga puan theih a ni chu lawmawm a tih thu sawiin Bazarveng huam chhunga dawrkai, restaurant siam leh bazara ni tin inzuar thinte pawh a hmun lova bawlhhlawh paihte chu hawihhawm taka bawlhhlawh paihna kawhhmuhtu ni turin a chah.   MJA Mamit District President C.Ramdinzela pawhin faina leh thianghlimna kawnga hmasawnna a awm zel chu lawmawm a tih thu a sawi bawk.   Bazar veng huam chhunga khawtlang hruaitute leh tlawmngai pawl hrang hrang aiawhte pawhin thu sawiin an veng paltlanga kalten Bazarveng huam chhung chu khawlaia bawlhhlawh paih lohna veng a ni tih hriatsaka vawnfaipui turin an ngen.   Mamit Bazarveng hian Children Sanitation Club neiin anni hian hunrei tawh tak ata khawlaia bawlhhlawhte tifaiin hnatlang an nei thin a. He hunah hian Children Sanitation Club-te hak tur UD&PA buatsaihsak T.Shirt an nghal bawk.