ZALEN November 17, 2023 : Vawiin khan BJP Mizoram chuan BJP State Office, Mipui Run, Upper Republic-ah Friday Political Session neih niin, Assembly Speaker hlui Lalrinliana Sailo chuan thu sawina hun a nei a, Mamit bial chu sumdawn nan an hmang emaw tih mai tur a ni, a ti.

Rinliana Sailo chuan, "Mamit bial ah BJP Official Candidate niin kan hotute duhsakna changin hma kan han la a, nimahsela Mamit Bial hi sumdawn nan an hmang emaw tih mai tur khawpa a awm hi a pawi takzet a, inthlan a nasa taka sum buai a kan buai ta hi a pawi tak zet zet a ni. Hetiang anih avang hian Mipuite pawh hi kan thanharh a hun tawh takzet a, Inthlan laia sum tlem kan duh vanga kan Ram hmalam hun tur pawh ngaihtuah thei lova kan awmna hian, Mizoram hmalam eng kan neih theih loh phah thin a, nakina kan hnathawh tur pawimawh tak takte hi kan ngaih pawimawha kan thlir a hun tawh zawk a ni," a ti.

Assembly Speaker hlui chuan, "BJP hi 2024 ah pawh Central ah an la sawrkar dawn tih hi mithiamte sawi dan a ni a, Mizoram budget tinung thar tur hian Central-a la sawrkar tur party, BJP bawk hi min khaichhuaktu atana pawimawh tak a ni a ni, Pu Modi-a hmalakna ropui tak 'Make In India' chuan India ram hmasâwnna nasa takin a thlen," a ti bawk.

Vanlalhmuaka pawhin thu sawiin, "Mizoram hian Mizo pa dik tak, Kristian dik tak ram hruaitu atan kan mamawh tawh a, BJP chuan hnam culture theuh chawi nung a, mahni sakhua ah theuh rinawm hi kan tum leh kan kal dan a ni. Hetiang mi Mizoram-in kan thlan tlin hunah chuan, Medical College tha ber, Zirna In tha ber, Damdawi-in tha, kawngpui tha, thalaite tan hna tam tak thawh tur siam sak te hi a ni dawn a, chu chuan hnam inluangrualna leh hnam entawntlak kan nihna alo lan tir thei dawn a ni," a ti bawk.