ZALEN October 24, 2023 : ZPM chuan Mizoram chhunga Sports lama hmalakna kalrual lo lutuk chu hriatthiam har an tih thu an sawi a, Mamit district lama Sports infrastructure dinna atan pawisa a kal hnem lutuk chu tum neisa a hmalakna nia an hriat thu an sawi.

Vawina chanchinthar lakhawmtute an kawmnaah ZPM chuan, Sawrkar kal lai mekah hian Sports infrastructure atan Cheng nuai 55404.30 hman a ni an ti a, hemi atanga cheng nuai 22061.4 lai chu Mamit district atan hian hman a ni a, Mizoram mirhing cheng zat atanga teha 8% chauh chenna district atana hetiang zat hman hi a rualkhai lo hle a ni, an ti.

Mamit district hi ZPM chuan an lawmpuiawm an tih rualin he district-ah hian infiammi te enkawl tur sawrkar hnuaiah coach pakhatmah an awm lo a, office pawh pakhatmah a awm lo tiin, infrastructure din ringawt hi sports lama hmasawnna nia an hriat loh thu an sawi.

ZPM chuan infiammi te hi ngaihsak tak tak an ni lo an ti a, Bajaj Insuarance-ah Cheng 475/- in insuarance tih theih a nih thu leh, heng infiammi te hian inhliam avanga harsatna an tawk anih chuan cheng nuai 2 thleng insuarance hi an claim thei tih an sawi bawk.