ZALEN Oct. 14, 2025 : Mamit a Tlawmngai Pawl hrang hrang aiawh leh lirthei lian neitu kalkhawm chuan Ni 16.10.2025 (Ningani) atanga tiam chin awm loin Mamit District chhunga inkalpawhna kawngpui dan pin vek an tum.

Hemi chungchangah hian Tlawmngai Pawl leh Lirthei lian neitu pawl chuan hetiang hian thuchhuah an siam:

Date. 3rd October, 2025.(Zirtawpni) a, All NGO’S MAMIT leh COMMERCIAL VEHICLE ASSOCIATION MAMIT. Joint Committee, Siamliana Hall, Mamit a thukhawm chuan Mamit District tana châk lakna leh veivahna Motor kawngpui pawimawh Mamit to Aizawl, Mamit to Bairabi leh Mamit to Zawlnuam te chu lirthei eng chi tan pawh kal hleih theih loh khawpa chhia chu pawi a tiin chhuanlam ho te te siam tawh lova a rang thei ang bera siam that a nih theih nan Mizoram Sawrkar chu thuchhuah siamin a lo ngen tawh a.

Date. 4th - 12th October, 2025 chung Sawrkar hmalakna nghakin a lo ngaichang a, Sawrkar hmalak dante a hmun ngeiah kalin enfiah a ni a. He hmalakna leh ngenna hi Sawrkarah beiseina sang tak nei a, kan thlir mek laiin hmalakna mumal leh beisei anga hnathawh a awm lo tih hmuh a ni.

Kan din hmun hetiang hi a lo nih tak avangin Date. 13th October, 2025.(Thawhtanni zan) dar 7-ah Siamliana Hall Mamit-ah kan hmalak zel dan tur Joint Meeting neih leh a ni a, kan kawngpuite hi Sawrkarin siam tha tura a taka hma min lak sak hma loh chuan Date. 16th September, 2025.(Ningani) atangin heng kawngpui, Mamit to Aizawl, Mamit to Bairabi leh Mamit to Zawlnuam te hi tiam chin awm loin eng Lirthei mah kal tlang theih loh tura Kawngpui dan chah ni se kan ti.

Mamit District mipuite hetianga hma lak angai ta mai hi a pawi kan ti a, kawng hrang hranga harsatna thleng thei lakah mipuite hriatthiamna leh thlawpna kan ngen e.