Aizawl March 11, 2023 : Vawiin khan Mamit District Silver Jubilee lawmna Chhimveng YMA Hall, Mamit-ah neih a ni a, Dy. Govt. Chief Whip Lalrintluanga Sailo, Dampa bialtu MLA ni bawk chu khuallian niin Mamit bialtu MLA Er. H. Lalzirliana leh Hachhek bialtu MLA Lalrindika Ralte chu khualzahawm an ni.

Khuallian chuan District an nih Kum 25-na a lo ni ta chu lawmawm a tih thu sawiin dawmkan ngai reng District an nih loh nan rilru thar put a ngaih thu a sawi. Chenpui hnam hrang hrangte chu an chenhopui thiam a pawimawh thu sawiin zirna leh thiamna lamah tan la thar zel turin a chah a. District Headquarter a chengte chu hmasawnna kawng engkimah hmahruaitu nih tum turin a chah bawk.

Lalrintluanga Sailo chuan, "Tanrual chu chakna a nih angin Aspirational District kan nihna atanga kan chhuah theih nana theihtawp chhuahtu  turin District mipuite ka sawm a. Hmasawnna pawt hniamtu ni lo tur leh midangte nek tum rana khawsa lo turin ka chah bawk che u a ni," a ti

Khualzahawm Er. H. Lalzirliana chuan Mamit District-in Silver Jubilee a hmang thei chu lawmawm a tih thu sawiin puitling zia nei a, lanchhuahtir zel turin leh hmasawnna lam kawnga  rilru hmang turin kalkhawmte a chah.

Khualzahawm dang Lalrindika Ralte chuan Pathianin min siam chhan anga rawng inbawlsak tawn a, dinhmun sang zawka awmte'n dinhmun hnuaihnung zawka awmte theih ang tawka tanpui a, dawmkang thin turin kalkhawmte chu a chah bawk.

He hunah hian Rohlupuia Chhangte chuan Mamit District chanchin sawiin hman leh tun dinhmun Documentary Video thlirhona neih a ni.

Mamit District hi Sq. Km 3025.75 a zau niin Area zau zawngah Mizoram-ah pahnihna a ni a. March 1998-ah Aizawl West District ti-a District thar din niin tunah hian Village Council 89 leh Sub Village 10 a awm mek a ni.

Mamit District Silver Jubilee lawmna-ah hian Chapchar Kut 2023 Photo Competition result puanna neih nghal niin YMA zaipawl leh Mizo hnam lam thlirho anih bakah zaithiam lar tak tak zai ngaihthlak a ni bawk.