Liverpool manager chuan Premier League hmahruaitu Man City chu an umphak theih a rin tawh loh thu a sawi chhuak a, mahse Pep Guardiola erawh chuan Jurgen Klopp-a thusawi chu a awih sak lo hle thung. "Liverpool hi Premier League title la lo turin an ngaihtuah hi ka ring thei lo," a ti.

Tunah hian Manchester City hi table lamah an mahni dawttu Liverpool aiin point 9 zetin hma an hruai fal tawh a, mahse match khat-a khel tlem zawk Liverpool hian February ni 23 khian Leeds lakah hnehna an chang a nih chuan point 6-in an inkar an pawt hnai thei ang. 

Reds hian April thaa Etihad Stadium lam an len luh hunah an inkar point tih zim leh zual theihna hun tha an nei leh bawk a, hei vang hian Guardiola chu ngaih ngamin a la awm mai thei bik lo. League champion ni tur chuan theih tawp an chhuah chhoh zel a ngaih thu a sawi.  

Mo Salah leh Sadio Mane ten Africa Cup of Nations khel a an thang bo san chung pawhin Liverpool hian an match hnuhnung pathumah chakna an chang vek thei a, mah se an boss Klopp-a berin champion theih a in beisei thei tlat lo. 

Ningani zana Leicester an hneh tumin Klopp-a chuan, "Kan tan umphak ngaihna an awm tawh lo. Mahse, kan tan chance a awm tawhlo tih vang hian kan beidawng mai tur chu a ni lo, kan dinhmun tha thei ang bera siam turin theihtawp kan chhuah zel ang," tiin a sawi chhuak a ni.