A chunga thu khi kan tawng ni lo mah se hriat thiam a harsa lo, Manchester Evening News-in Pathianni chhuak tura an phek hmaa an khaw club chungchang an ziah thupui a ni. Pep Guardiola thlalak lian tak nen dahin Manchester City-in nomawi pathum lak an tum zinga pakhat an la tih a chian tak thu an sawina a ni.

Inrinni zanah Arsenal-in Nottingham Forest an hneh loh rualin City chuan a zawnin season thum chhung Premier League champion an ni tih a chiang ta.

Gunners hian season tluan deuhthaw hma hruai mah se tunah chuan khelh khat chauh an neih tawhah City hi point liin an phak lo mek a, phak ngaihna a awm ta lo.

Guardiola kaihhruai hian season ruk liam ta chhungin vawi nga zet English champion nihna an chang ta a ni.

Pathianni hmasa zana Everton khelmuala an chak a lawmnaah khan Spanish manager hian anmahni tantute hmaah ‘vawi hnih chiah, vawi hnih chiah’ tiin champion tura chak an la ngaih zat a sawi a; mahse, a tak takah chuan vawi khat pawh an lo mamawh tawh lo, an champion ta der a ni.

City hian Treble champion nih tumin FA Cup leh Champions League final an la khel dawn a, thla thar ve ve a ni tawh ang.

1998-99 season khan an thenawm, Manchester United chuan nomawi pathum hi an lo la ruak tawh a, anni chiah hi English club zinga Treble thei an la awm a, June 3-ah Wembley-ah an inhmachhawn ang a, chawlhkar khat hnuah Istanbul-ah Inter Milan an hmachhawn zui ang.

Premier League nomawi bik hi Pathianni zan hian Chelsea an mikhual hunah hlan an ni dawn a ni.

City zinkawng leh Gunners tan uiawm
City hi a vawi kua nan English champion an ni ta a, an kalkawng a awlsam lutuk bik lo va, chutih rual chuan Gunners tan ‘mualphona’ tia sawi mai theih turin, rei tak hma an hruai hnuah a tawpah nomawi an thlauh va, ‘a tawp boruak sang an ngam lo’ tia sawi an awm pawhin a mak lo vang.

April 7 maiah pawh khan Arsenal hian point riat zetin hma an la hruai fal a; mahse, Mikel Arteta kaihhruai hian vawi khatin an khel tam thung.

Premier League chanchinah vawi 28 khelh tlin tawha point riata hmahruai tawh bawk sia champion zo ta lo palina chauh an la ni.

Hei mai a ni lo va, inkhel vawi 10 hmabak a la awm thlenga point 69 hmu tling tawh chunga champion lo pahnihna an ni bawk a. Liverpool khan 2018-19 season khan hetiang chiah hian hma an lo hruai tawh a, a tawpah point 97 zet hmu mah se City-in point khatin an champion khalh tawh.

Arsenal tan a uiawmin heti zata hmahruai chunga nomawi an la ta chuang lo hi a mualphothlak zawnga sawi theih a ni ang a, chutih rualin City ropuizia tilangtu a ni bawk.

City hian an inkhelh hnuhnung vawi 11-ah hnehna an chang vek a, point 42 hmuh theihnaah point hnih chiah an hloh bawk a, tun hnaiah an kaltluang tak zet a, hei hi khelh thum la nei chunga Arsenal an champion khalh theihna pui ber a ni.

City hi England-a league sang bera a zawna vawi thum champion thei pangana niin Huddersfield Town (1924-26), Arsenal (1933-35), Liverpool (1982-84) leh Sir Alex Ferguson-a kaihhruaina hnuaiah Manchester United vawi hnih (1999-2001 leh 2007-09) te an lo champion zawn tawh hlawm.

Guardiola bik hi a zawna league nomawi vawi thum a lak tum thumna a ni a. La Liga-ah Barcelona chu 2009-11 khan champion-pui zawnin Bundesliga-ah 2014-16 chhung khan Bayern Munich a champion-pui zawn bawk.

City-in season ruk chhunga Premier League nomawi vawi nga an lak theih ang hi Manchester United chiahin an la ti thei a, 1996 leh 2001 chhung khan lo hlen chhua ktawhin Treble champion an nih pawh kha hetih chhung hian a ni.

United hi an pui hrim hrim a, season kua, 1993-2001 chhung khan vawi sarih zet an champion thei a. Season sarih, 2007-2013 chhung khan vawi nga an lo champion tawh bawk.

Premier League pian hma khan Liverpool an loropui viau tawh bawk a, 1970s tawp lam leh ‘80s tirlamah khan United ang deuh hian league sang ber an lo awp hneh viau tawh thin.