Club ropui Manchester City, Real Madrid leh Barcelona te chuan Erling Braut Haaland hi lei chhuah tumin in biakna an neihpui vek tawh a, an sawmna erawh a chhang dawn nge a hnar dawn tih tun ni 10 chhung hian thutlukna a siam dawn niin Guillem Balague chuan a sawi.

Borussia Dortmund lama Haaland-a contract hi 2024 hian a tawp dawn a, mahse kum 21 mi hi a release clause ringawt pawh £63.2 million a la ni hem mai. "Heng club pathum te hian an hma hunah eng nge thleng dawn an la hre thei lo" tiin Balague chuan a sawi.

Haaland beiseitute zingah hian Bayern Munich pawh an tel thin a, mahse an ni erawh an inhnukdawk tawh niin sawi a ni. 

BBC Sport European football expert, Balague chuan Champions League game 19 khelh-a goal 23 thun thei Haaland-a chungchang sawiin, "Amah beiseitu club te hian an ruahmanna leh an chhawr duh dan tur thlengin an sawi pui tawh a, heng an thu leh hla zawng zawng te hi manager leh director te pawhin an hriatpui vek a ni," a ti. 

Haaland hi a duh chuan Dortmund lamah a la cham chhunzawm thei a, a cham rih dawn a nih chuan kum hnih bawr vel chu a club ngaiah khelna hun a la nei a, chumi hnuah chuan a khelh chakna ber La Liga team tha Real Madrid emaw Barcelona a zawm rin a ni bawk.

"Real Madrid hi a khelh chakna ber chu ni mahse, Kylian Mbappe a lut mai thei a, Karim Benzema lah a chetha rih bawk si, i tan hmun tha a awm lo mai thei, Barca lamah lut ta la, an tan Real hneh a harsa dawn bawk si," tiin amah duhtu City lam chuan an sawi thaih deuh a ni awm e. 

Norway striker Haaland hian tun season-ah Dortmund tan game 22 khel tawhin goal 23 a thun tawh a, January, 2020-a Red Bull Salzburg atanga a insawn luh atangin German club tan hian a changtupa ber ala ni chho ta char char a ni.