Zanin dar 9 hian Premier League lama Champion tur rinkai team tha pahnih Manchester City leh Liverpool te chu entu mipui 53,400 lenna Etihad stadium-ah an inhmachhawn dawn. Match 30 khel ve ve tawh a, point khat chauha inthlau team pahniha chak zawk zawk hi Premier League champion an ni thei mai a ngem?
   

Champion lai Manchester City hian khelh 30-ah point 73 hmuin game 23 chakin tum thum chiah an la tlawm a, an khingpui tur Liverpool pawhin match 30 khel tawhin khelh 22-ah chak tawhin point 72 an nei mek a, tum hnih chiah an la tlawm thung. Heng team pahnih te hnuaiah hian Chelsea awmin anni hian khelh 29-ah point 59 chauh an la nei phak a, Champion beiseina a sang tawh rih lo. 
   

Manchester City leh Liverpool inkhel hi tun season Premier League final ang hiala ngaih thei a ni a. Zanin a chak zawk team hi team dang lakah an chesual hle a nih loh chuan nomawi chawi turah an ngaih theih awm e. Team pahnih hi an thimna leh theihna a san dun em vangin han chungnung zawk tur sawi mai a har hle a, vanneih leh vandui inkar erawh a zau hle thung ang. 
   

An coach te pahnih hi tun hnaiah tunge tha zawk tia khaikhin an ni zauh zauh a. Manchester City fans te hian hlawhtlinna vawi tam chanpui tawhtu an manager Pep Guardiola hi Jurgen Klopp nen thlak thleng dawn ta se an phal dawn hauh lo va, chutiang bawkin Liverpool supporter lam pawhin an German pa hi Champions League nomawi Anfield lama hawn kir leh saktu a nih miau vangin khawvel coach tha berah an ngai hmiah bawkin a rinawm. 
   

Liverpool hian hmatawng lamah world-class player Mohamed Salah leh Sadio Mane an nei a, City lam player chhuan Bernardo Silva, Phil Foden leh Kevin de Bruyne te nen hian tute nge thiam zawk tih in zawt ila kan chhanna a inang lo fur dawn tih a hriat reng. City lam defender inkawp nghet Kyle Walker leh Joao Cancelo te nge Liverpool duo Trent Alexander-Arnold leh Andrew Robertson te chetha zawk dawn? Anni hi goal tur dan mai bakah assist kawngah an thawh hlawk hle a, Arnold-a te pahnih hian thawhhlawk zualin an pahnih hian tum 31 zet mai midang tih goal tur an siam sak tawh a, Walker-a thian dun pawh hian assist tum 10 an nei ve tawh.