DOWNLOAD OUR APP

Read latest news on your phone
app-store
Man City vs Arsenal: Kum 10 chhunga English top flight inkhel lian ber
Apr 26, 2023

Premier League chung luahtu pahnih, Manchester City leh Arsenal chu Nilaini zan hian an inhmachhawn dawn ta a, ‘kum 10 chhunga English top flight inkhel lian ber’ ti hiala sawi a ni.

Gunners hian point ngain hma an hruai fal mek a; mahse, Pep Guardiola kaihhruai aiin vawi hnihin an khel tam thung.

Team hnih hian Etihad Stadium-a chak zawk hi nomawi inchuhna boruak sang taka a tawpna khartu ropui zawk an ni thei dawn tih an inhre ve ve.

Thla tira point riat zeta sang fal, Mikel Arteta kaihhruai Arsenal hi an champion hnuhnung ber chu 2003-04 daih tawh kha a ni.

Hetih lai hian City ve thung hi kum ruk chhunga a vawi nga nana Premier League lak tum an ni a, tun season phei chu FA Cup leh Champions League nen, thil thleng khât tak hlen chhuaha ‘treble champion’ nih an tum.

1994-95 Premier League nomawi latu zinga zinga mi, Chris Sutton chuan, “Arsenal hi an kal vung lai an tawlh thlu a, an player-te ngei pawh an inringtawk zo dawn lo,” tiin a sawi.

“Manchester City erawh an phur hle dawn a, he hunah hian an tum hlemin hnehna an chan pawh ka ring,” a ti.

Nomawi latu tur tichiangtu inkhel?
Manager pahnih chuan an inkhel tur hi Premier League nomawi latu tur tichiangtu tur a nih loh thu an sawi ve ve a; mahse, thil thleng tawh atang thlir erawh an sawi dik lo ve ve a tih theih.

Tun hi Premier League chanchina hmahruaituin vawi 33 leh a aia tam khel tlinga point nga leh a aia tlema hma an hruai laia an hnuai chiaha mi nen an inhmachhawn vawi kuana tur a ni.

Heng inkhel vawi kuaah hian a tlawm zawk zinga pakhat chauhvin nomawi an la zui thei a, Chelsea-in kum 2008 khan Manchester United chu 2-1 in an hneh a; mahse, a tawpah Sir Alex Ferguson-a team hi point hnihin an champion zui ta tho a ni.

Tun ang hun leh dinhmuna a sang pahnih inkhelh tum a thlen hnuhnung ber chu kum 2014 daih tawh kha a ni a, hemi tum hian a tu ve ve mah an champion zui lo thung a. Chelsea-in Anfield-ah hmahruaitu, Liverpool chu 2-0 in an hneh a; mahse, hetih laia vawi khata khel tlem zawk, City-in an pahnih hian an champion khalh daih.

Data analysts Nielsen Gracenote chuan City hi nomawi la tura an chance neih 79% niin a tar lang a. Nilaini zana Arsenal an chak a nih chuan an champion chance 55%-ah a chho vang a, City an chak zawk a nih erawh chuan 11%-ah a tla dawn thung niin an sawi bawk.

“Arsenal hi chak lo thiang an ni lo va mah se an chak lo vang,” tiin Sutton hian 3-1 in City an chak a ring.

“Arsenal hi Manchester City-ah kalin an chak ang a, an champion bawk ang,” tiin kum 2012-a season tawp nia City an champion tuma tel, Micah Richards chuan a sawi ve thung.

Arsenal hian City hi an lo hneh hlauh a nih pawhin nomawi la turin khelh hmabak panga an la neiha chak vek ngai dinhmunah an ding zui dawn tho va. City an chak erawh chuan an kawng awlsam hretin khelh sarih an la neiha vawi ruk an chak chuan a zawna vawi thum nan an champion thei ang.

“Zan khirh leh hautak tak a ni dawn a; mahse, kan tan remchang lian tak a awm,” tiin kum 2016 leh 2019 chhunga City-a Guardiola assistant-a lo tang tawh, Arteta chuan a sawi.

“A tir atangin engkim kan hria a, Premier League-a champion nih kan duh a. Spurs-ah kalin kan hneh a, Chelsea tlawhin kan chak leh bawk.

“Hei hi kan lo hlen chhuah tawh a ni a, hei tak hi City tlawha kan hneh theihna tur chu a ni. Champion nih i duh chuan heng inkhela i chak hi a ngai, chutiang taka awlsam chu a ni,” a ti.

Arsenal an tawlh thlu dawn em?
April thla a det khan Arsenal hi City aia vawi khata khel tam chungin point riatin an sang fal a; mahse, tun hnai inkhel vawi thumah an tumpui an hnehtawk.

Etihad Stadium-a an chak lo leh a nih phei chuan nomawi hi an lak leh lak loh chu an kuta awm a ni tawh dawn lo va, inchawitute zingah chuan City chak ring panga zelah Arsenal chak ring pakhat chauh an awm mek.

Gracenote chuan nomawi an lak theih chance hi 21%-ah dahin October thla tir hnua an hniam lai ber a ni.

Gunners striker hlui, Kevin Campbell chuan “Nghawr, khi leh nghing a awm a; mahse, an la keh chhe lo. Arsenal hian chance tha tak an la nei a. Mikhual ni chunga chak record tha tak an nei a, eng nge an hlauh ang?” tiin Football News Show-ah a sawi.

Richards pawhin, “Arsenal tantute tan chuan an kalkawngah bumboh tam tak a awm a, engmah inthlak danglam a la awm lo niin kei chuan ka ngai thung. Tuna Etihad-a kal chu thil huphurhawm a ni.

“Mi tinin City chak tura an rin avangin Arsenal tan pressure a awm dawn lo,” a ti.

Gunners hian nomawi hi an la phak lo ta hlauh a nih chuan heti taka dinhmun thaa awm tawh chunga champion lo zui ta hlauh mi tlem zingah an tel dawn.

Manchester United (1998 leh 2012) leh Arsenal (2003) te kha vawi 28 khelh tawhah point riat zeta sang fal chungin a tawpah an champion lo va. A kum leh chiahah erawh an champion ve ve thung.

Vawi 28 khelh tlina hma hruai fal viau sia champion lo langsar ber chu Newcastle United niin 1995-96 season khan point 12 zeta an fal tawh hnuah an champion lo.

Arsenal hian khelh 10 an la neih khan point 69 an hmu tawh a, hetiang dinhmuna ding chunga nomawi la phak lo hi pakhat chiah an la awm a. Liverpool kha 2018-19 season-ah dinhmun tha taka a awm hnuah season tawpah point 97 hmu mah se point khata an phak loh City-in an champion khalh daih.

Arsenal tana pawi langsar ber mai chu a hnung na avanga France defender William Saliba an chhawr thei lo hi a ni a. Season tir atangin inkhel vawi 27 zet bul a tan hnuah a hnuhnung pangaah erawh a inlan thei tawh lo.

A khelh loh hian a a tela an goal chhuat let deuh thaw (a telin 0.9 leh a tel lohvin 1.8) an chhuah a. A tel lohva an khelhin 40% chauh an chak theih laiin a tel chuan 77.8% zet an chak thei thung.

“Arsenal tana tul tak chu an squad pangngai chelh reng a ni,” tiin New York Times-a thawk, Rory Smith chuan a sawi.

“Saliba tel lo chuan an ngheh ang thin an ni phak lo va, engmah an thunun thei lo,” a ti.

City leh Haaland
Arsenal tana vanduaithlak tak chu an elpui, Manchester City an che tha tluang em em mai hi a ni.

City hian intihsiakna hrang hranga an inkhelh hnuhnung vawi 13-a vawi 12-ah hnehna an chang a, inkhel vawi 16-ah tlawm an nei lo zawn tawh.

Kum 2016-a Guardiola enkawlna hnuaia an awm atangin Premier League-ah hian season tawp dawn inkhel hnuhnung vawi 10-ah point 21 atanga 30 an hmu thei a, tun season chhiar telin inkhelh apiangin point 2.44 zel an hmu phak tihna a ni.

“Tuna hetiang dinhmuna kan ding hi a lawmawm,” tiin Guardiola chuan a sawi a. “A tir lamah kha chuan Arsenal an che tha a, tun ang hunah hetiang dinhmun hi kan kai kha ngaihtuah a harsa hle.

“Inkhel pawimawh a ni takzet dawn a, point kan hmu a nih chuan tun season-a kan elpui lian berin an hmu ve dawn lo tihna a ni,” a ti.

Arsenal tana huphurhawm leh dang chu Premier League-in a hmel hriat tawh zinga goal thun thei ber, Erling Haaland hi a ni.

Kum 22 mi chauh, nikum nipuia Borussia Dortmund atanga an lak luh hian City forward hian Premier League inkhel vawi 38 atangin goal 32 a thun tawha a, minute 90 dan zelah goal 1.29 thun ziah ang a ni.

Season khata inkhel vawi 38 a awm china goal thun tam ber, Mohamed Salah-a record chu Haaland hian a nihrual der tawh a, khelh riat hmabak a la nei a. Intihsiakna hrang hrangah goal 50 thun tling turin goal hnih chiah a mamawh tawh bawk.

Champions League semi-final-a Real Madrid hmachhawn tur leh FA Cup final-a Manchester United la hmachhawn leh tur City hian treble champion ni turin inkhel vawi 12 an la nei.

Manchester United chiah hi English team zinga treble champion ni thei niin 1998-99 khan an lo hlen chhuak tawh a. Celtic, Ajax, PSV, Barcelona, Inter Milan leh Bayern Munich ten an lo ti thei tawh bawk.

Leicester City hnua rinkai lo ber
Arsenal hian nomawi an la a nih chuan Arsene Wenger-a hnuaia 2003-04 hnua Premier League-a an champion leh hmasak ber a ni dawn.

Arteta hi club tana kum 2011 leh 2016 inkara lo khel tawh niin kum 2019 atangin a enkawl tan a, FA Cup pathum a lakpui tawh.

Tun season-ah hian champion tura rinkai parukna chauh ni phak kha an ni a, mi 50 zela pakhat chauhvin nomawi an lak ringin an chungah Manchester City, Liverpool, Tottenham, Chelsea leh Manchester United an awm.

2015-16 season-a Leicester an champion nawlh khan mi 5000 zela pakhat chauhvin an champion an ring kha a ni a, hemi hnu lama champion tura rinkai lo ber an champion lehna hmasa ber a ni ang.

Leicesnter an champion hnu lamah erawh City hi kum tin mai champion rinkai ber an ni zel thung a, kum ruk chhungin vawi nga an champion reng bawk a. Tunseason-ah pawh rinkai ber an ni tho bawk.

Latest News & Chhiar Hlawh