Aizawl August 4, 2023: Mizoram State Law Commission meeting vawi 42-na chu vawiin khan an Chairman Lala Khobung hovin a Office Chamber-ah neih a ni a. 'Mizo Inneih, Inthen leh Rokhawmna Dan, 2024' siamthat chungchang sawiho a ni a, man leh mual inhlan Inneihna tlingah pawm an rel.

He Dan hi siamthat ngai ni a hriat a nih avangin Law Commission pathumna Chairman, Lal Khobung hovin enzui a ni a. Siamthat rawtna te pawh CYMA, MHIP Gen. Hqrs. Bakah mimal atangte a dawn a ni. Rawtna atanga an pawm langsar zingah 'Mizo' tih Dan dinglaiin a hrilhfiah chu sawrzim hret a ni a. Inneihna chungchanga tihdan pangngai Biak Ina Kut insuih la kalpui thovin, Biak In thleng kher lo va Mizo Dana man leh mual inhlan chu Inneihna tlingah pawm nise, tih te a tel.

'Mizo Inneih, Inthen leh Rokhawmna Dan, 2024' siamthat chungchang hi hun engemawti chen atangin Commission chuan a lo buaipui tawh a. Vawiinah hian a tam zawk chu zawh fel a nih thu sawi a ni. He Dan hi Law Commission hmasa bera Chairman, R. Lalrinawma, Ex-Dy. Speaker hova buaipui niin, a hnu a Chairman, John Siamkunga, Ex-MLA hova zut mam lehin kum 2014 khan Mizoram Legislative Assembly chuan hman theih turin a pass a. Dt. 13.2.2015 atanga hman tan a ni.