Aizawl: Shalom chuan YRG Care nen tangkawpin man tlawm zawka Hepatitis ‘C’ (HCV) te enkawl an tum a, August 10, 2017 atangin hmalak tan an tum. Shalom thawktute hnen atanga Zalen thudawn danin HCV enkawl nan hian a tlem berah Mizoram Health Care Society chuan Rs, 42,000 vel an seng a; mahse, Shalom leh YRG Care, Chennai tangkawp chuan damdawi man zawng zawng leh thisen test na man nen vek Rs.20,000 velin pek theih an beisei tih an sawi a. Damdawi an hman/pek tur hi khawvel damdawi tha ber zinga mi, India rama Drugs Controller te pawhin an pawm a ni tiin treatment la te chu a hnu zela an awmdan thlengin enzui zel an tum niin an sawi. Shalom Director Dr.Chawnglungmuana chuan damdawia inchiu thin (drugs addict) 846 an test zingah 742 (87.7%)-in HCV an vei tih a sawi a. “HCV thehdarhtu lianber chu drugs addict te an ni tih a chiang a, chuvangin vaccine hi kan pek theih chuan a kaidarh zel tur hi nasa takin kan ven theih a beiseiawm a ni,” a ti a. Tuna HCV vaccine an hman tur chuan kar 12 chhungin a tidam vek thei niin a sawi bawk. HCV inkaina chu thisen leh taksa atanga tuihnang chhuak ah a ni tiin, “HIV aiin HCV inkaitheihna hi a let 5 in a sang zawk a. Damdawia inchiu thinte pawh syringe inhmantawmloh mai a tawk lova, a chawhna, filter leh thil dang intawm atang pawha a kai theih avangin fimkhur a ngai hle a ni,” a ti bawk. Ruahman dan chuan Shalom hian a tirah sum nei deuh hnenah hma la hmasain heta sum tlingkhawm hmang hian a rethei leh neilo zawkte enkawl chhunzawm zel an tum a. Inenkawlna tur sum hi tum khata petla theilo tan pawh installment a pek theih tura duan a ni. MSACS chhinchhiah danin Mizoram pumah damdawia inchiu thin mi 8760 an awm a, heng zinga 4263 chu Aizawl khawpui a cheng an ni.