Uefa Europa League atangin Manchester United chu hnawh chhuahin an awm a, puh tur dang zawng thei an ni lo, ‘anmahni vang chauh’ tih theih.

Ningani zana quarterfinals thawh hnihnaah Sevilla chu 3-0 in an hneh lo va, Old Trafford-a 2-2 a an lo inhnehtawk tawhna nen 5-2 in an tlawm.

Inkhel pahniha goal nga an chhuah hi enlet chuan, an tumpuite hi ‘tha takin an pui’ ti ila a sual lo vang.

Ramon Sanchez-Pizjuan Stadium-a inkhelah hian goal hmahruai leh hnuhnung ber, Youssef En-Nesyri thunte kha keeper David de Gea leh Harry Maguire-a tihsual vang a ni a. Loic Bade-a tauh luh pawh Spanish keeper hian a ennawn hunah chuan a dan fo thin a ni tih a hria ang.

United hian Old Trafford inkhelah khan si hnih faiin hma an hruai ngar ngar a, an lamah goal hnih thunin 2-2 in an lo inhnehtawk phah tawh bawk a nih kha.

Manager Erik ten Hag-a pawh a lawm lo tak zet a, hetiang reng rengin inkhel zawh interview-ah a la thinrim ngai lo ni hialin an sawi.

“Thil tha hlawhchhuah nana hun remchang tha lutuk a ni a; mahse, engmah lovah kan chantir a, keimahni vang a ni,” a ti.

Europa League-a Sevilla an hneh lo hi league-a an dinhmun en pawhin ‘a mak’ tih theih a ni a. La Liga-a 13-naa awm, tlak hlauva tang mek an ngam lo.

Europe inelnaa knock-out stage chinah Sevilla an hmachhawn tawh vawi ngaah an la chak lo vek a, khawmualpui huap inelnaa heti zat an hmachhawn tawha an la hneh miah loh awmchhun an ni.

Season ruk chhung a zawnin United hi European knockout stage-ah Spanish-in an pet thlakna a ni ta a, heng zinga vawi thum hi Sevilla an hneh loh a ni.