City hian October thla tir khan Etihad Stadium-ah Manchester derby khelin 6-3 zetin United an hneh a nih kha. Tun hnaia United rawn chet tha chho chu fakin Manchester City manager Pep Guardiola chuan an el pui Manchester United pawh table chung ber luah thei turin an kir ve leh mek thu a sawi. 

United hian kum 2013 hnuah Premier League an chawi leh tawh lo a, an trophy hnuhnung ber pawh 2017 daiha an lak kha a ni tawh a, City erawhin a zawna Premier League nomawi vawi thum chawi tumin an bei mek thung. 

City laka 6-3 zeta an tlawm hnuah match sarih chhung chak loh nei lovin an kal tluang mek a, Guardiola chuan an manager Erik ten Hag hnuaiah hma an sawn chhoh mek thu leh a tha zawnga an inthlak danglam thu a sawi.

Guardiola chuan,"United hi an rawn kir leh dawn tih hriat lawkna ka nei a, a tawp a tawpah chuan United an rawn kir leh ta. Nilaini khan Sheriff Tiraspol 3-0 in an hneh khan an rawn kir leh tih ka hmu tawh a, Chelsea nen kar tawp a 1-1 a an inhnehtawk khan ka hmu tawh bawk," a ti. 

Sawi zawmin,"Tun dinhmuna United awmna hi ka hmuh a, United ang beitu team pawh tam tak an awm chho dawn a ni. Chuvangin Champions League khel phak tur leh nomawi chawi thei tura in beih a ngai a ni," a ti.

Guardiola chuan tun season-ah Newcastle chuan hma an sawn hle a, title an la phak lo a nih pawhin top 4-a inhlang thei turin theihna an neih thu a sawi bawk.

"Tottenham an hmachhawn lai ka hmu tawh a, an central defender ten Kane leh Son te chu man to man a ancheck vangin harsatna an thlen phak lo a ni," tiin a fak zui. 

Sawi zawmin,"Season-a a game thumnaah kan khel a. He team hian kar khatah game khat lek khel angin han mitthla ve chhin teh? Eddie hi manager tha tak a ni tih a chiang a ni. Player thar an nei a. Huaisen takin an khel bawk a. Table chung lama awm tur zingah an tel a ni," a ti.