Cristiano Ronaldo fapa Ronaldo Junior chuan Manchester United Under-12 tana khelin a pet goal a, a pa goal lawm dan 'Siuuu' hmangin mual sirah a goal thun a lawm a, entu mipui lawm a hlawh. 
   

Manchester United leh Portugal star Cristiano Ronaldo fapa Cristiano Ronaldo Jr chuan Manchester United U-12 goal hnihna a thun a, Spain ram-a tournament khelhah hian Manchester United hian an tumpui  Girones Sabat team chu si 5 faiin an hneh.

Kum 11 mi Ronaldo Junior hi second half-ah bench atangin a lut ve chauh a, minute 68-ah chuan ball changin a khalh phei a, hnai set sawt atangin chiang zetin a pet lut a ni. Goal a thun zawh hian a pa goal lawm dan bik zuang paha a kut pahnih kawkal a keng char at 'Siuuu' hmangin a goal thun a lawm zui.
   

Ronaldo Jr hian United academy a zawm hnua club tana a goal thunna hmasa ber a ni lova, thla thum liam ta khan West Bromwich Albion lakah goal a lo thun tawh a ni. 

Ronaldo Junior-a pa kum 37 mi Cristiano Ronaldo hian tun season competition hrang hrangah goal 18 a thun tawh a, game khelh tur tlem a la neihah hian goal a la thun belh ngei beisei a ni.