Newcastle United-in 6-1 zeta an sawp hnuah an boruak a ngui a, fan an thinrim a, manager bân zui a ni bawk a. Boss lailawk hnuaiah 2-2 in Manchester United an hnehtawk hram a, an duhthusam result ni lo mah se Tottenham boruak a kang veleh hret e.

Ningani zana inkhelah Spurs hi an tlawm leh teuh hle a, chawlhlawk hmaa Jadon Sancho leh Marcus Rashford-a goal an phurh chu second half-ah Pedro Porro leh Son Heung-min hmanga sutin point khat an hlawh chhuak a, vawi li chak zawn tum United an dang.

Spurs hian season an hman that loh avangin Antonio Conte an bân a, a aiawh lailawk tura an tih, Cristian Stellini hnuaiah hma an sawn lo va, Magpies laka an tlawm hnuah an player hlui, Ryan Mason-a kovin a khelhpui hmasak berah point a hlawhpui.

Mason hi April, 2021-a Jose Mourinho an chawlhtir tum pawh khan a aiawh lailawk tura an tih tawh tho kha a ni.

“Pathiannia khati tak maia kan tlawm hnuah kha chuan thil a khirh zui em em a ni,” tiin a sawi a. “Tuna pawimawh ber chu season tawp thlenga team anga kan khelh a ni,” tiin inlungrualna an mamawh tak zet tih a sawi.

United lakah hian si hnih an phurh hmasak tho avangin fan an lawm lo va, thinrima au an awm a; mahse, a tawpah erawh an duh ang result nei lo mah se an hlim leh ta.

Spurs tan point khat hmuh a hlut tluk zetin United tan point hnih loh a pawi a, Magpies chu poit hniha phak lovin khelh khatin an khel tlem hret thung a, palinaah an awm.

Tottenham erawh pasarihna atangin Aston Villa leh Liverpool lehpelin panganaah an chho va, Europe-a inlan phak an tumna kawnga point hlu tak a ni.

Hetih rual hian an tum ber Champions League chu an tan a la huphurhawm hle a. Newcastle-in khelh ruk leh United-in khelh sarih an la hmabak laiin Spurs hian khelh nga chauh an nei tawh a. Magpies hi point riat leh United hi point rukin an la phak lo mek a ni.