Manchester City tan nomawi pathum a hnai zel a, tun kar chho phei chu ‘an puja a fuh’ tiin sawi ila an boruak a sawi fiah ber hial awm e.

Uefa Champions League-ah Bayern Munich an hneh hnuah league-a an elpui lian ber, Arsenal an tawlh thlu zui a, Inrinni zanah FA Cup-ah Sheffield United hnehin final an lut leh ta bawk.

Wembley-a inkhelah an goal machine, Erling Haaland chuan thun lo mah se Riyad Mahrez an nei tho va, Algerian forward hattrick hmangin si thum faia chakin phu takin  final an lut.

Blades-in hun tha nei hmasa zawk mah se an thun lo va, chawlhlawk dawnah Daniel Jebbison-a’n Bernardo Silva laka penalty a chawi chu Mahrez hian thunin minute 61 leh 65-ah thun belh zui a; Alex Dawson-a’n Manchester United tana kum 1958-a FA Cup semifinal-a hattrick a siam hnua siam leh hmasa ber a ni ta.

City manager Pep Guardiola tan pawh awlsam taka chak hi a thlamuanthlak a, Premier League nomawi an chuhpui mek, Arsenal nen Nilaini zana Etihad Stadium-a an inkhelh tur atan Haaland, Jack Grealish, Bernardo Silva leh Ilkay Gundogan te chu hma taka la chhuakin a hahdamtir theih phah.

City hian nomawi pathum lak an tum chu an ban pha thuak ta hlawm theuh va. Premier League bikah phei chuan khelh riat an la neihah hmahruaitu an khum theih ngei rinna a lian ta hle a, khelh hniha Arsenal aia khel tlem chungin point nga chauhvin an hniam tawh a, Nilaini zana an khel tur hi a tu zawk zawk tan pawh ‘final a ni’ a tih thei ang.