Premier League bul an tanna match hnihah Brighton leh Brentford an hneh tawh lo a, hun harsa an tawk chho mek laiin Erik ten Hag-a leh a pawlte chuan an hmelma kumhlun Liverpool 2-1 a hnehin an nui ve ta.

He inkhelhah hian Red Devils tan Sancho leh Rashford ten goal khungin season liam taa Premier League pahnihna Liverpool lakah club satliah an nih loh zia an pho lang. Hun tawp dawn lamah Liverpool tan Mohamed Salah-a'n goal a khung a, United lam hi goal thun tam zawk ni mah se, Reds lam hian inkhel chu an thunun zawk a, nidang ang bawkin an hlauhawm thei hle a, United fans te thin-thiin an inkhel an thlir tir thei lo.

United hian Real Madrid atanga an lak thar Brazilian midfielder Casemiro tlangzarhna hun an hmang nghal a, club neitute laka lungawi lo fans lam pawh an result leh player thar vang hian an phur deuh sawtin a rinawm. 

Point 3 hlawh chhuaktu, tun season-a chak la neilo table mawng ber pahnihna United hi 19-na atangin 14-naah an chho a, tlawm nei lo, chak chuang lo, nizana tlawmta Liverpool chu table-a 16-naa awmin an zuan khum. Liverpool hian United an hmachhawn hma hian tum hnih draw an nei tawh a, khelh hnihah point hnih an nei a, season liam ta thlir chuan che tha tak zawng an ni lo. 

Brighton leh Brentford laka mualpho United boss Erik ten Hag chuan sawisel huamin risk a la a, huaisen taka thutlukna siamin tum danga a luhtir thin captain Harry Maguire, Luke Shaw leh superstar Cristiano Ronaldo te a awl tir a, a hmatawngah Rashford, Sancho leh Anthony Elanga te hmangin a nawr. Liverpool hi team tha tak an nih vangin na taka kan nawr let a ngai tia sawi lawktu ten Hag-a'n thutlukna dik a siam a, point thum hlu tak a hlawh chhuak. 

Inkhelh-a thil thleng thenkhat

0' Match tan a ni. 

10' Elanga'n a pet goal teuh hle a, post a pet per.

15' Man Utd lamin Sancho hmangin an goal khatna an thun. Man Utd 1-0 Liverpool

18' Diaz-a'n goal a shot a, mah se goal mouth-ah a lut lo. 

23' Alexander-Arnold-a'n Yellow Card a hmu

25' Eriksen-a'n free kick a chuih a, an dan sak

44' Dalot-a'n Yellow Card a chawi

52' Rashford-a'n Man Utd goal hnihna a khung. Man Utd 2-0 Liverpool

56' Rashford-a bawkin goal a shot a, mahse an dan sak

66' Fabinho-a'n keeper zawnah a head

73' Bruno Fernandes-a'n Yellow Card a hmu

76' Rashford-a'n ar a shot khum

80' Man Utd 2-1 Liverpool (Salah)

Line-ups
Man Utd XI: De Gea, Eriksen, Varane, Bruno Fernandes, Dalot, Rashford, Sancho, Martinez, McTominay, T. Malacia, A. Elanga
Subs: Ronaldo, Heaton, Maguire, Fred, Shaw, Martial, Van de Beek, Wan-Bissaka, Alejandro Garnacho

Liverpool XI: Milner, Henderson, Alisson, Firmino, Salah, Van Dijk, Robertson, Joe Gomez, Alexander-Arnold, L. Díaz, Elliott
Subs: Adrian, Fabinho, Tsimikas, Fabio Carvalho, Van den Berg, N. Phillips, H. Davies, Bobby Clark, Stefan Bajcetic