Aizawl August 2, 2024 : Vawiin khan Mizo Hnam Runah chhung inkhawm neih a ni a. Political session-a thusawitu Ex-Minister PP Thawla, MNF Adviser chuan, “Kan chan chhiat ber lai pawhin taihmak i chhuah ang u,” a ti a. ZPM sawrkar chu kum khat em pawh an la kal lova, a beisei aia an that loh thu a sawi.

PP Thawla chuan: “Kum 2023 election-ah kan tla a. Tumah indem tur kan awm lo. Mangan ni kan tawh avangin ka chau mai tur a ni lo. Kan chan chhiat lai tak hian taihmak chhuah zual sauh ila.

“ZPM sawrkar chu an ngen chiam angin mipuiin an sawrkar tir a. Ka lo thlir danah - budget vawi hnih han pass phawt sela an dinhmun dik tak a lang ang. Amaherawchu, kum khat em pawh an la kal lo chungin an dinhmun chu hetiang mai hi a ni si a,” a ti.

“MNF party-ah i rinawm tlat ang u, kan ding chhuak leh dawn. Kan sawrkar chhung khan Mizoramin hun khirh tak a tawk a, Pathian-in MNF kha ram kaihruai turin a ruat a. Tunah chuan kan sawrkar laia kan tih dik lohte siam thaa retreat nei turin min dah a ni. MNF hi ram leh hnam tana Pathian ruat a ni a, kan ding chhuak leh ngei ang. Chutiang tur chuan i inbuatsaih ang u,” tiin, Thawla chuan party mipuite a sawm.