ZALEN October 21, 2023 : Mizo National Front adviser leh minister ni bawk, Lalruatkima chuan, “Kan manifesto hi 80% vel hi chu kan tihlawhtlingin kan hria a, kan tihlawhtlin rih lohte pawh nasa taka hma kan lak meknate a ni hlawm a. Kan ti tha thawkhat hle a ni,” a ti.

Nimin khan Aizawl Press Club-ah chanchinbumite kawmin Lalruatkima chuan, “MNF hian kan manifesto kan siam hian kan ti mai mai lo a, ram leh hnam tana tha tur uluk taka zirchiang chungin kan duang a. Kan sawrkar hnu pawhin party leh minister-te hian kan manifesto bu keu chung hian ram hruai hna kan thawk a. Kan manifesto-ah hian hmalak miah lohna kan nei lo hialin kan hria a, chuti chung chuan han tihhlawhtlin nghal rum rum theih loh chi a awm a, chu’ngte chu kumin 2023 Election Manifesto-ah hian an telh zui leh a ni,” a ti a. “Pathian leh mipui khawngaihna changa MNF kan sawrkar leh a nih chuan he ram leh hnam tan hian hnathawh zawh loh tam tak kan la nei a. Hengte hi thatho tak leh taima takin kan thawk zui dawn a ni,” a ti bawk.

Ruatkima chuan, “Kan hmalakna tlangpui zawr zawr han en pawh hian kan thawk tha thawkhat hle tih a lang thei a, MNF sawrkar hi ngawi renga hnathawk mawp mawp mai thin, inpuangzar ve vak vak lo kan nih avangin kan hmalakna tam tak hi mipuite hian an hre tawk lo fo a. Hetiang a nih avang hian hnathawk mang loa min puhtute min puhna pawh hi thutaka lo ngai tawk an awm thin. Pathian leh mipui zarah MNF hian sawrkarna kan chang leh ngeiin kan ring a, hri lengte a ziaawm zel ang a, boruak zalen leh pangngai hnuaiah nasa lehzualin mipuite rawng kan bawl thei ngei ang tih kan beisei a ni,” a ti bawk.