Aizawl May 6, 2023 : Vawiin khan PC Party hruaitute chuan an office Zaluta building Venghlui-ah emergeny meeting neiin Manipur-a Zo hnahthakte dinhmun an sawiho a, he hunah hian an President Vanlalruata chuan Manipur-a tangkhan Mizo te hruaichhuak turin Chief Minister Zoramthanga a phut. 

President Vanlalruata chuan, ''Kum 1979-a Mizo leh Silchar Vai te inkara buaina namên lo a chhuah muma, Mizote Silchara thih hlauhawma tangkhang, Chief Minister Brig.T.Sailo-a'n zuk luhchilha, amah ngeiin tuboh leh dolung inkara lêng Mizote a zuk hruai chhuak ang khàn, tuna kan unau Manipur-a thi leh dam kara lêngte chhanchhuak turin Chief Minister Pu Zoramthanga lo chu Pa ber chan chang tur mi dang kan la nei hrih si lova; Chuvangin a rang thei ang bera hruai chhuah hna thawka che chhuak ve ngei turin PC Party chuan C.M. Pu Zoramthanga kan ngen a ni, " a ti.

Vanlalruata chuan, "Mi ramah kan unaute mangang leh thlabara an awm laia,  keini hi kan ngawih renga khawvar kan nghah mai chuan hnam-a chian ringawt in awmzia a nei dawn lo a, chuvangin Mizo Nationalism hi tun huna tan hian a ni dawn lawm ni?" a ti bawk.