Aizawl May 10, 2023 : Tukin zing khan Mizoram Journalists' Association President C.Lalrambuatsaiha chuan Manipur state a remna leh muanna a awm theihna atana Aizawl atanga Imphal thleng kea kawngzawh tur Lalbiakthanga chu Vanapa hall kawt atangin a vailiam.

Kawngzawh tur vailiamna hun tawi buatsaihah thu sawiin C. Lalrambuatsaiha chuan, "Pu Lalbiakthanga thupui remna leh muanna hi a ropui hle a. Inhmangaih tlanga khawsak ho dial dial duh mi a ni te hi a entawn tlak hle a ni," a ti a. 

MJA President chuan Biakthanga chu ram vei mi a ni tih sawiin Burma rama muanna a awm theihna atan leh mipui thlan sawrkar 'democracy' tundin anih leh theihnan Aizawl atanga Zokhawthar thleng kawng a zawh tawh bakah India zalenna hmuh champha vawi 75-na pualin Mizoram khawpui hrang hrang ke in a fangchhuak tawh tih sawiin ropui a tih thu a sawi. 

Tun tuma remna kawngzawh a nei tur chu tluang tak a a kal theih nan duhsakna a hlan tih a sawi bawk. Lalbiakthanga hian zanin hian Tuikhurhlu ah riah a tum a. Churachandpur thlenga kal hnuah boruakin a zir chuan Imphal hi thlen ngei a tum a ni.