Aizawl: Central YMA hriatpuina in vawiin hian Churachandpur (Manipur) ah petrol trip 1 leh diesel trip 1 thawn leh a ni dawn a, Oil hi mipui mamawh dan a zirin thawn zel tum a ni. Central YMA General Secretary Lalhmachhuana hnen atanga Zalen thudawn danin Manipur a Zohnahthlakte tan hian petrol trip 2 leh diesel trip 2 thawnchhoh a ni tawh a, hengte hi mipui hnenah rualkhai taka sem a ni a. Manipur ah petrol litre 1 Rs. 120 a an hralh laiin Rs. 90 leh diesel pawh litre ah Rs 100 a an hralh laiin Rs. 80 in an hralh niin a sawi a. Petrol leh diesel chu Mizoram chanpual tur phurhchhuah an phallo nia sawiin Silchar atanga lak chauh an remtih bakah fimkhur takin seal nen ngei an kaltir thin tih a sawi. Central YMA General Secretary chuan dan lova petrol leh diesel te Manipur ah phurluh anihloh nan Keifang, Darlawn, Zohmun, Vervek, Hnahlan, Ngopa, Ngur leh Sesawng khua ah te duty an indah tih a sawi a, heng hmunah te hian uluk taka duty ani tiin mipuiin an ngenna an zahsak avanga lawmawm a tih thu a sawi a. Mahse hetih lai hian engemaw hun remchang melha kallui an awmpalh awm thei nia sawiin hetiang a ruka kallui man an awm chuan YMA chu a tawp thlengin a kal dawn tih Zalen a hrilh a. YMA duty te thingpui lumna atan Ngopa leh Darlawn ah Rs. 5000 ve ve leh hmundangah Rs. 4000 theuh an pe niin a sawi. Lalhmachhuana chuan an ngenna ngai pawi mawh lova Manipur a kal tum motor 10 chuang chu an tirhaw tawh tih sawiin heng zinga a luhlul zual 2 chu an la hreng mek niin a sawi .