ZALEN August 9, 2023 : Manipur tualchhung buaina avanga Zofate leh Meitei indona chuan ni August 10, 2023(Ningani) hian ni za (100) na a thleng dawn a. Manipur tualchhung buaina hian ziaawm lam a la pan thei lo mai ni lovin zual lam a la pawn zel a ni. Mizo Zirlai Pawl (MZP) General Headquarters chuan Manipur tualchhung buaina avanga zofa nunna chan ta hriatreng nan August 10, 2023 (Ningani) zan dar 8:00 hian Aizawl Vanapa Hall-ah “Hnam tana nunna chante sunna leh inpumkhatna inkhawm” a buatsaih dawn.

Mizo Zirlai Pawl (MZP) General Headquarters chuan, "Manipur state chhunga kan unaute tawrhna hi a hre reng a, an tan tih theih a neih apiang a ti zel thin a, a la ti zel dawn bawk a ni. MZP chuan ni August 10, 2023(Ningani) zan dar 8:00 hian Aizawl Vanapa hall-ah “Hnam tana nunna chante sunna leh inpumkhatna inkhawm” a buatsaih dawn a, sunna leh inpumkhatna inkhawm hi LPS 10 ah leh ZONET Bawhbel ah live telecast a pek chhuah a ni ang. ‘Hnam tana nunna chante sunna leh inpumkhatna inkhawm’ ah hian MZP chuan Zofa khawvel hmun hrang hranga awm te rawn tel turina sawm a, a hmun a rawn kal thei lo tan mahni awm hmun a min lo chhim sak vek turin kan in ngen a ni," an ti.

Hnam tana nunna chante sunna leh inpumkhatna inkhawmah hian  Manipur tualchhung buai avanga harsatna tawk mek zofate te tan tawngtai rualna neih a ni ang a, Zoram mipui zawng zawngte MZP chuan tan nasa lehzuala Pathian au a, tawngtai turin a sawm nghal bawk a ni.