BJP kaihhruai Manipur-a tangrual sorkar chu hmarchhak state-a thla thum chuang chi leh chi inkara buaina a chhuah tak avangin an thawhpui party pakhatin an kalsan ta.

MLA pahnih nei, Kuki People’s Alliance chuan Zirtawpni khan Governor Anusuiya Uikey-i hnenah sorkar an thlawpna hi an hnukdawk tih an thlen a. Anni hi chhuak mah se Chief Minister Biren Singh-a sorkar erawh a derthawn phah lo vang.

“Uluk taka sawihova inrawn a nih hnuah sorkar kan hrawn mek, Chief Minister N Biren Singh-a sorkara tel reng chu a theih ta lovin kan ngai a. KPA-in sorkar a thlawpna chu kan hnukdawk ta a ni,” tiin KPA chief Tongmang Haokip-a’n lehkha a thehluhah hian a ziak.

KPA hian Saikul bialtu, Kimneo Haokip Hangshing leh Singhat bialtu, Chinlunthang te chu member 60 awm theihna assembly-ah an MLA neih an ni a. BJP hian MLA 32 neiin Naga People’s Front aiawh panga leh independent MLA pathumin an thlawp bawk a, hei vang hian Singh-a sorkar hi a la tlu mai thei lo.

Politics-a inlumlet thar a awm tukah chiah hian Manipur-ah hian tharum thawhna lian tak thleng lehin mi paruk an thi a, Bishnupur-Churachandpur district ramri-ah nilenga inbeihna a thleng zui a. Inrinni hi tun hnai thla chanve chhunga ni khata thi an tam ber ni a ni.

Boruak tang thar leh mek karah hian sorkar laipui pawhin Inrinni zan khan Imphal-ah venhim hna thawktu tur mi 900 a thawn luh belh leh ta bawk.

Union home ministry hian May 3-a buaina a chhuah tan atang khan army leh paramilitary force mi 40,000 chuang a dah lut tawh bawk.

Manipur-a buaina hi Kuki-ten Meitei-in Scheduled Tribe (ST) status neih an dilna duh lohna an lantir atanga intan niin mi 170 vel thi tawhin mi sang tam tak baihvaiin an awm phah mek.