Manipur-a cheng zinga hnam tam ber, Meitei vantlang pawl lian leh pawimawh tak chuan an state-a thla thum chuang chi leh chi inkara buaina chhuak tawhah N Biren Singh-a sorkar chuan a ngaihsak tawk lo nia ngaiin an boycott tih an puang.

Meitei pawl hrang hrangte inzawm khawmna, Coordination Committee on Manipur Integrity (COCOMI) hian July thlaa kawng zawh puitham tak an huaihawta resolution an siam hrang hrangte tihhlawhtlinsak zawngin sorkar hi a kal lo niin an sawi.

“Kawng kan zawh ni-ah khan resolution panga kan siam a; mahse, sorkar hian tihhlawtling tur lam kawng a zawh lo. COCOMI chuan sorkar hian a mite a ngaihsak loh em avangin a lakah tiamchin awm lovin social boycott kan puang a ni,” tiin an pawl coordinator, Jeetendra Ningomba chuan a sawi.

An mite chu sorkarin inkaihhruaina leh awm dan tur a zam (government measure) zawm lo turin an ti tih a sawi bawk.

“Kan boycott chhung hian tute mah sorkar thuneitute thu anga kal lo tur leh sorkarin thiltih khawm a huaihawtah pawh tel lo turin kan inngen,” tiin Ningomna-a hian a sawi.

COCOMI hian resolution an siam zingah August 5-a special assembly session ko turin Singh-a sorkar hi an phut tel a. “Emergency session koh kan phut a; mahse, state government hian kan ngenna hi a tihlawtling dawn lo,” a ti.

Manipur Minister Sapam Ranjan Singh-a chuan thla hmasa khan August thla tirah session a awm dawn thu a lo sawi tawh a; mahse, a hun engmah a sawi tel lo.

Manipur-a Meitei leh Kuki intihbuaina chhuak mekah hian mi 170 vel an thi tawh a. May 3-a tlangram district-a tribal-ten Meitei-in Scheduled Tribe (ST) status neih dil duh lohna kawng zawh, ‘Tribal Solidarity March’ an huaihawt atangin hnam hnih inkarah hian buaina a chhuak zui a ni.