Manipur-a cheng tribal-te chuan ‘inrelbawlna hran (state hran tluk) neih an phutna kal zelah an state bakah an pawn lam state pangaah Nilaini hian pun khawm (rally) an huaihawt dawn.

Minister pawh telin Manipur-a Zo hnahthlak MLA 10-te chuan Mizoram Chief Minister Zoramthanga pawh Aizawlah hmu tawhin an state-a buaina awm chin fel a nih theih nana hma lakpui turin an ngen.

Inawpna hran hnuaia awm an phutna nawr nan hian a vawi khat nan Kuki-Zo tribal-te hian an state bakah state dang panga velah rally hi an huaihawt dawn a ni.

Manipur-a tribal pawl inzawm khawmna, Indigenous Tribal Leaders’ Forum (ITLF)-a an hruaitu, Ginza Vualzong chuan rally liantham tak hi Mizoram, Tripura, Delhi, Karnataka leh Tamil Nadu-ah an huaihawt dawn tih Inrinni khan a sawi a. Hemi rual hian Manipur-a district hrang hrangah huaihawt a ni bawk ang.

MNF President Zoramthanga chuan Manipur tribal MLA-te nen hian Ninganiah an inhmuh thu leh Manipur-a Naga hruaitute leh Nagaland dawra an thenawm state-a chi leh chi inkara buaina awm sawipui turin an ngen tih a sawi.

Manipur-a Kuki-Zo tribal MLA-te chu an state-a buaina a awm lai hian Naga tribal-te nen inkungkaihna titha tlat turin a lo hrilh tih a sawi.

“Manipur tribal MLA leh minister-te hi sorkar laipui pawh bepawp renga eng chiah nge Manipur-ah hian thleng tih hrilh reng turin ka lo rawn a ni,” a ti.

Chief minister hian an party, MNF chu Manipur bakah thenawm ram, Myanmar, Bangladesh leh ram danga an unau harsatna tawkte tan an ding reng tih a sawi bawk.

“Mizoram hi khawvel hmun hrang hranga Mizote tan a ni,” tiin Aizawla an party worker-te hmaah a sawi a ni.

Zoramthanga hi a cabinet leh an MLA-te nen July 25-a Mizorama NGOs Coordination Committee-in Manipur-a buaina chhuaka Kuki-Zo tribal-te tawrhna hriatpui nan leh an lamtang an nihzia lantir nana ‘Solidarity March’ an huaihawtah pawh khan an lo tel tawh.

Manipur MLA 10-te hian an state-a buaina a chhuah tan atang tawh khan tribal-te tana inrelbawlna hran hi an phut tawh a, an zinga pasarih hi rorel lai, BJP MLA an ni nghe nghe a. Sorkar laipui leh state sorkar bakah BJP hruaitute chuan an thil phut hi hnawlsakin Manipur-a inlungruala an awm theih dan tur an dap tih an sawi.

ITLF hian Manipur Chief Minister N. Biren Singh pawh buaina a chhuah a\ang khan bâng turin an lo phut tawh a ni.