Manipur Chief Minister N Biren Singh chuan a sorkarin dan lova an state-a lutte an hriat chhuah theih nan State Population Commission a din thu leh sorkar laipuiin a pawmpui a nih chuan National Register Of Citizens (NRC) pawh kalpui turin a inpeih tih a sawi.

Singh-a chuan, “NRC kalpui tur hian sorkar laipui pawmpuina kan mamawh rih a; mahse, dan lova lo lut leh chengte chu population commission hmang hian kan hre chhuak thei tho dawn a ni,” tiin Zirtawpni khan a sawi.

Manipur-ah hian tun hnai khan an khawpui, Imphal-a sorkarin khua leh tui dik takte hming ziaka dan lova khawsate hriat chhuah theihna tur kalpui tum anga a insawi chu ‘a tikhawmuang’ nia puhin lungawi lohna liantham tak lantir a ni.

Kar tir lamah khan zirlai pawl bakah mipui pawlten lungawi lohna an lantira chief minister chenna pana kawng an zawh chu police nen pawh nasa takin an innawr nghe nghe.

Mipuite hian an state-ah hian an mi ni lo, ram pawn lam - Myanmar, Nepal leh Bangladesh atang thlengin an lut nasa a, ram leilung fate nihna, khawsak phung lei eibar zawnna thlengin a nghawng dawn niin an sawi a. State sorkar chuan heng dan lova lutte hi man chhuaka thawn kir leh an phut a ni.

Nikum khan state cabinet chuan JD(U) MLA Kh Joykishan-a’n assembly inkhawma private member resolution a put luh an pawm hnuah Manipur State Population Commission din tur hian a pawm zui leh a ni.