Aizawl May 12, 2023 : Manipur-a tlangmi MLA sawm te chuan thuchhuah siamin Manipur State atanga inlak hran an duh tih thuchhuah an siamah an tarlang a, Union of India hnuaiah inrelbawlna hran ngiat an tum.

Tlangmi MLA te chuan May 3, 2023-a Manipur-a tharum thawhna chhuak khan mihring tam zawk Meitei te ruahman lawk sa niin Manipur sawrkar dinglai chuan anni hi a thlawp an ti a, tlang rama cheng Chin-Kuki-Mizo-Zomi te chuan hei hi inthliarhran naah an ngaih thu leh Manipur atanga indan ngiat a nghawng thleng dawn an ti.

Tlangmi te chuan tribal community hawtu te nen Manipur-ah huang khatah a awm theih tawh loh an ti a, MLA, Ministers, pastor, police leh civil officer, pa naran, hmeichhia leh naupang te pawh zuah an ni lo an ti. Pathian biakna hmun te, In leh bungrua tam tak tihchhiat a ni te ngaihtuah hian Meitei kara khawsak chu an mipui te tan thih pawh a thlanawm zawk, an ti.

Heng te avang hian Mipui te thlan, an aiawh kan nihna angin, kan mipuite thinlung mil zawnga kan awm a ngai a, kan duhdan fo thin angin Manipur atanga inlak hran mai hi a hun ta niin kan hria. Politics thila inrawnkhawm erawh kan mipui te nen kan neih a ngai dawn a, hmalak thuai dan tur kan ngaihtuah thuai a ngai dawn a ni, an ti.

Manipur state hian min humhim zo tawh lo chu a ni ber a, chuvangin Union of India hnenah, Constitution of India hnuaia Inrelbawlna thar hi kan ngen dawn a, Manipur nen hian thenawm tha tak leh ingeih takin kan awm thei ang, an ti bawk.

He thuchhuah an siamah hian Manipur tlangram-a zohnahthlak te chenna china MLA 10 ten hming an ziah hnan a ni.