Kum hnih em pawh la liam lovah khan Indian nula kum 20 mi chuan Manaus khawpui, Brazil-ah ram pali hmeichhe football team-te inelnaah amah vengtu chiang taka tlansanin goal a thun a, kha khan Indian football-a a hming hriat tanna a ni.

Tunah chuan kha goal thuntu, Manisha Kalyan-i kha Indian Women’s Team tana mi pawimawh a ni mai tawh lo va, football hmunpui Europe-ah pawh a hming lam rik a ni ta sek mai!

Manisha-i hi Indian zinga football ram ropui, Brazil laka goal thun thei hmasa ber a ni a; hei mai ni lovin, Indian zinga UEFA Women’s Champions League tana goal thun hmasa ber niin tun kar khan Apollon Ladies FC tan Georgia-ah WFC Samegrelo lamah a thun a, India hmeichhe football tan hun ropui a thlentir.

“Hoshiarpur-a kan khaw tereuh tê atanga Cyprus-a Apollon Ladies FC tana khel tura kal hi ka tana career pawimawh tak a ni a. Training-na hmun thleng hmasa ber leh haw hnuhnung ber nih tumin ka pan a. Rim taka ka thawhna chuah rah tha a chhuah ta a; thawhrimna, inpekna leh tumruhna hmanga ka hlawh a ni,” a ti.

“Tunah hian ka tum ang tak ka la hlen lo va, chawl hman ka la ni lo; thui tak kawng zawh tur ka la nei a ni,” tiin Manisha-i hian Cyprus atangin www.the-aiff.com hnenah a sawi. 

Indian hmeichhe tan chuan Apollon Ladies ang club-in an hnena khel tura an lak hi hlawhtlinna ropui tak a ni tawh a. Cyprus-ah chuan sulhnu nei tha ber niin a zawnin league leh cup vawi kua an la zawn tawh a. Champions League-a an vawi hnih khelhnaa European champion vawi hnih lo ni tawh, Umea IK an hneh phei chuan football chanchin a luah hneh hle.

Manisha-i football zinkawng hi naupang tê a nih atanga intan a ni a. Indian infiammi tam tak chawr chhuahna, Haryana-a sei lian niin an veng leh an sikul atangin infiamna lam hi a âwn tan a. Football a khelh châkna chuan infiamna dang a hliah thuai a, khelmualah a theihna a pho lang zui ta fo bawk a ni. 

“Ka sawi tawh angin, inpekna lian tak ka siam a, chu ka inpekna chu eng emaw thil avang mai maiin luanraltir ka tum lo. Sum leh paia harsatna leh chhungkuaa harsatna neuh neuh ka paltlang tawh a, a bik takin ka pain tawhsual a tawk a, hun harsa tak ka patlang a ni,” a ti. 

“Ka inpekna hian min khalh kal a, ka tum tihlawhtling turin chakna min pe a, ka hmaa harsatna awm pawh su thei turin min buatsaih a ni,” a ti.

Hla taka mahni in kalsana Cyprus-a khawsak a hrehawm em tih an zawh chuan Manisha-i hian, “Ka lung a leng thei em em a, kan nunphung (culture)-ah chhungkua kan inpawh thin si a, hla taka han awm chu chona lian tak a tling,” a ti.

“Ka zin kawngah hian rilru leh taksa fit that a pawimawh ve ve a. Taksa fit chuan hma lam min pantir ngei a; mahse, rilru lam a fit si loh chuan ka lan dan a famkim thin lo,” a ti.

Manisha-i hi February thlaa Chennai-a Nepal nen friendly match a khelh hnuah India kawr hain Asian Games leh Women’s Olympic Qualifiers Round 2-ah a inlan zui dawn. 

“Asian Games leh Olympic Qualifiers Round 2 ka khel tur hi ka phur tak zet a. Ram tana ka khelhpui thian leh coach te nena inhmuh hi a nuam a. Ram tana ka khelh hian ka inchhuang a, national jersey ka hak hi chuan thil dang zawng zawng aiin nuam ka ti thin,” a ti.

“Asian Games-a ranking-a sang zawk, Chinese Taipei leh Thailand kan hmachhawn tur hi India-a women’s football tana hun pawimawh a ni a. Team khawng tak mai hmachhawn hi a nuam a, chumi tur chuan ka inbuatsaihin min tiphur a ni,” tiin India forward hian a sawi. 

AIFF Player of the Year 2023 hian tuna a tum ber chu FIFA World Cup-a India khelhpui a ni a. “Chumi tur chuan kei pawhin rim zawka thawkin, remchanna apiang hmang tangkai chungin, ka club tana tha taka khel zel chunga inbuatsaih ka tum a ni,” a ti.