Aizawl March 27, 2023 : BJP Mizoram chuan vawiin khar karthar inhlanna leh Political Session an nei a, he huna thusawitu BJP State Vice President R. Vanramchhuanga, President Charge la tu chuan thu a sawi a, Manki Bhatt Programme-a Prime Minister Narendra Modi thusawi chu a Kristian hle a ni, a ti. 

R. Vanramchhuanga chuan, "Prime Minister Pu Narendra Modi-a'n Manki Bhatt Programme-a a thusawi hi a Kristian hle a, India ram mipuite hnena a ngenna hi, keini Kristiante sawia mawi niin, Isua Krista pawh midang tana a inpek ral vek ang khan. Pu Modi-a chuan Mihring Organ-te chu midang tana Donate turin min ngen a, Mizoram-ah erawh tih theih a la nilo mai thei a, Mit Donate erawh tih a ni thung. Kan Mihring hun tawp huna kan taksa peng te midang tana Malsawmna a nih theih nan a pek ve te pawh Mizoram mipui te hian kan la tih ve ngei a rinawm a, a Kristian hle dawn in a lang," a ti.

R Vanramchhuanga chuan, "ZPM Leader Lalduhoma'n BJP te thudik lo tak hmanga min puhna hi a mak hle a, Pu Duhoma te hi lo Sawrkar dawn ta sel a, BJP do tu te hian an do te hnen atang hian engmah an dil an hmuh a rinawm lo a ni. A chhan chu; India President thlan na ah lah President atana kan Tribal pui anih vanga Droupati Murmu in Vote a dilna chu hnawlin min Vote pui theih loh thu an sawi kha Central  hian an theihnghilh ngai dawn lo a ni. Chuvangin ZPM hi inhampuar viau mahsela Uṭawk inhampuar ang chauh niin, reilo te ah an thep leh nghal mai dawn a ni. Tawngtam thiam avanga Mizoram mipui an bum kualna hi, a rah an la seng zawk ngei dawn a ni tih hi vawiin ah hian ka sawi duh a ni," a ti.

Chhuanga chuan, "Vawiinah hian Mizoram hi kan Kristianna lem lutuk hian Development ah pawh min ti thuanawp zawkin a lang a, Kristian eiruk pawisa lo, Political Leader nupui nei reng chunga hmeichhe dang kawp hreh lo, Kohhran upa nisi eiruk pawisa lo te kan nih nawk avang hian, kan Kristian na dinhmun pawh hi pawngsual ang hial niin a lang a, BJP chuan Mizoram leh Mizo hnam leh kan Kristianna hi India ram a ringlo mi te mithmuhah pawh Pathian hming sawichhiatna remchang an hmuh loh nana siam hi kan tum bawk a ni," a ti bawk.