Igor Stimac-a bânin All India Football Federation (AIFF)-in national team enkawltu atan Manolo Márquez an la thar a, tun kar atangin khelmualah a hna a tan tak tak dawn a. India player pawimawh, Lallianzuala Chhangte chuan an coach thar hi anmahni kaihruai tur dik tak nia a hriat thu a sawi.

AIFF Player of the Year Lianzuala leh a thiante hian tun kara ram leh ram inkhelh hunah Hyderabad, Telengana-ah ram pahnih khelin Intercontinental Cup an khel dawn a, hei hi Spanish coach kaihhruaina hnuaia an inlan hmasakna ber tur a ni.

Mumbai FC captain atana ruat thar, Lianzuala chuan, “Tun dinhmunah chuan Manolo (Márquez) hi min kaihruai tur coach tha niin ka hria. India-ah a lo awm reng tawh a, Indian player-te a hriat chian piah lamah an khawsak phung thlengin a hria a ni,” a ti.

“A pawimawh ber erawh ruahmanna fel tak a nei hi a ni a. Season tluana awmho kan nih loh avangin hei hi national team-ah chuan a pawimawh ber a ni,” a ti.

Coach thar hnuaiah bul an tan dawn a, a phur tawh tih Lunglei tlangval chuan a sawi a, “Bung thar kan kai tur hi ka phur a, Indian football hi he bung thar kai tur hian a inpeih tak zet bawkin ka hria,” a ti.

Márquez-a hna hmasa ber hi a lo tlangnel tawhna hmun, Hyderabad-ah khelh a ni dawn a, thla tharah Vietnam-ah Tri-Nations khelin November thlaah khelh tur an nei leh a. March, 2025 atangin AFC Asian Cup Qualifiers an khel zui ang.

Intercontinental Cup-ah hian Thawhlehni hian Mauritius an khel ang a, karleh Thawhtanniah Syria an khel zui dawn a. Hyderabad-a Gachibowli Stadium-a khelh tur niin Sports 18 3 leh Jio Cinema-ah en theih a ni ang.

Márquez-a’n India a fehchhuah hmasak ber turah hian Lianzuala bakah Mizo tlangval dang pathum, midfielder Lalengmawia Ralte (Apuia) leh Lalthathanga Khawlhring (Puitea) leh forwards Edmund Lalrindika te an tel bawk.