Football mi ropui bik, Diego Maradona tualchaina thin leh ropui taka a lo len tawhna, Naples khawpui chuan an hun nghahhlelh em em chu an thleng dawn ta ngei niin a lang ta.

Napoli chuan Pathianni zan khan tun hnaia point 15 an paihsak hmu let lehtu, Juventus chu hun tawp hma hreta Giacomo Raspadori goal hmanga si khat faia hnehin Stadio Diego Armando Maradona-a Serie A nomawi lawm turin point thum chiah an mamawh tawh.

Napoli hian Bianconeri hi Serie A season khata vawi hnih an hneh vawi lina chauh a ni a, Turin khawpuia an inkhelh hmasaka an chak tum kha 2009-10 season hnua mikhual ni chunga an chak leh hmasak ber a ni.

Khelh sarih la hmabak chungin Napoli hian point 17 zetin hma an hruai fal tawh a, kartawpah hian 14-naa awm mek, Salernitana an tlawh dawn a, an chak chuan an champion dawn a; point thum an hlawh chhuak pha ta rih lo deuh a nih pawhin tun season-a an chet dan enin khelh sarih atang chuan nomawi lakna khawp an hlawhchhuah ngei a rinawm ta hle.

Kum 1990-a Maradona hova Serie A nomawi an lak hnuah khan kum tam tak a liam tawh a, Argentine mihrang hian mual a liamsan hial tawh a. Khatih laia la piang lo leh naupang chumchiap tam tak kha tuna an fan ruhkawl, club tana thih thaa tang an ni fur tawh bawk.

Naples-ah hian Luciano Spalletti-a team-in khelh hmabak 10 la neia point 16-a hma an hruai lai, April thla tir atang tawh khan an ‘champion mai tur’ lawm lawk nan thler tinah club flag a intar tawh a; balcony-ah ‘100% campione’ tih banner intarte chu en peih a thu a ni mai, an tam lutuk tawh.

An khawpuia hmun laili, Quartieri Spagnoli atanga an khelmual hmingthang, Stadio Diego Armando Maradona awmna, Fuorigrotta leh a piah lam thlengin rawng pawl dal leh var vek a ni deuh ber tawh a. In leh step zawng zawng pawh hetiang tho hi a ni.

Maradona ho khan Napoli hian a vawi khat nan kum 1987 khan Scudetto an la a, an thlanmual lian ber pawnah hemi tuma an nomawi la lai thlalak hi tarin, “You don’t know what you missed,” tih ziakin an mi ropui hriat rengna an tilang.

“Kum 1990-a kan champion tum khan thla ruk mi chauh ka la ni a; mahse, Diego Maradona khel enin ka sei lian zui a ni,” tiin Naples tlangval pakhat, Vincenzo Credendino chuan CalcioNapoli24 TV hnenah a sawi a. “Tunah chuan he Scudetto (an lak tur) hi khatih lai nena min suihzawmtu ang mai kha a ni,” tiin a sawi.