Aizawl May 26, 2024 : Zirtawpni atang khan College Veng Kohhran Biak Inah Synod Mission Board buatsaihin Masihi Sangati hnuaia thawktute tan intuaitharna hun hman a ni a, zaninah a tiak ang.

Intuaitharnaah hian resource person pahnih, Rev. Dr. Vanlalbela leh Shalom Vanlalmawii ten thupui thlan bik hmangin zirtirna an pe ang.

Zirtawpni zan khan thupui zir inkhawm neih a ni a, Inrinni nilengin thupui zir inkhawm neih leh a ni a, zanah vantlang Pathian Biak inkhawm neih a ni thung a, Rev. H. Laltlantlanga, Synod Statistician-in thuchah a sawi.

Pathianni chawhma, chawhnu leh zanah te vantlang Pathian Biak inkhawm a awm ang a, chawhmaah Rev. Dr. K. Lallawmzuala, Executive Secretary i/c Mission-in thuchah a sawi ang a, chawhnuah Rev. R. Lalhmingsanga, Mission Board Secretary-in a sawi ang a, zanah Rev. R. Lalrinsanga, Masihi Sangati Kendra Director-in thuchah a sawi ang.

Intuaitharna hun hmang tur hian Mizoram chhung hmun hrang hrang leh Shillong atangin thawktute an kal khawm a, Masihi Sangati hnuaiah hian thawktu mi 214 an awm mek a ni.